लमजुङ (हाम्रो खेलकुद) – साविक विजेता श्री भगवती युथ क्लब टोखा काठमाडौं र बुद्ध युथ क्लब (बिवाइसी) भोटेवडार लमजुङमा जारी जिल्लाकै सर्वाधिक धनराशिको २९औं संस्करणको त्रिवेणी कप राष्ट्रव्यापी फुटवल प्रतियोगिताको फाइनलमा प्रवेश गरेका छन् ।

बेंसीशहरस्थित सहजी खेल मैदानमा मंगलबार भएको सेमिफाइनलमा आयोजक त्रिवेणी युवा क्लबलाई ३–० ले पराजित गर्दै श्री भगवती लगातार दोस्रो सिजनको फाइनलमा पुग्न सफल भएको हो । श्री भगवतीको जितमा अर्मान्ड वियोडानले दुई तथा अमित लामाले समान एक गोल गरे ।

खेलको २२औं मिनेटमा अमित लामाको गोलबाट श्री भगवतीले अग्रता लिएको थियो । ५१औं मिनेटमा अर्मान्डले गोल गर्दै श्री भगवतीको अग्रता दोब्बर पारे । ८०औं मिनेटमा अर्मान्डले व्यक्तिगत दोस्रो तथा टोलीका लागि तेस्रो गोल गर्दै जित पक्का गरे । श्री भगवतीका अमित लामा खेलको म्यान अफ दि म्याच घोषित भए । उनले ५ हजार रुपैयाँ हात पारे ।

अर्काे खेलमा बुद्ध युथ क्लब (बिवाइसी) भोटेवडारले समाज कल्याण खेलकुद काठमाडौंलाई ३–० ले पराजित गर्दै फाइनलमा श्री भगवतीसँगको भेट पक्का गरेको छ । विवाइसीको जितमा यान्निक, सन्दिप राना मगर र आश गुरुङले गोल गरे । सबै तीन गोल दोस्रो हाफमा भएको थियो ।

खेलको ५१औं मिनेटमा यान्निकले गोल गर्दै बिवाइसीलाई सुरुवाती अग्रता दिलाए । ८१औं मिनेटमा सन्दीप रानामगरले गोल गर्दै बिवाइसीको अग्रता दोब्बर पारे । ८९औं मिनेटमा आश गुरुङले गोल गर्दै टोलीको जित पक्का गरे । फाइनल बुधबार हुनेछ ।

१३ पुसबाट शुरु भएको प्रतियोगितामा लमजुङ, काठमाडौ, पोखरा, चितवन, तनहुँलगायत जिल्लाबाट गरी १८ टिमको सहभागिता रहेको छ । यसपालीको त्रिवेणी कपको विजेताले ५ लाख, त्रिवेणी कप र स्वर्ण पदक प्राप्त गर्नेछ । उपविजेताले ३ लाख र रजत पदक पाउनेछ ।सेमिफाइनल पराजित हुने दुई टोली त्रिवेणी र समाज कल्याणले समान ५०–५० रुपैया प्राप्त गर्नेछन् । सर्वाधिक गोलकर्ता र सर्वोत्कृष्ट खेलाडीले जनही १५–१५ हजार रुपैयाँ प्रदान गरिनेछ ।