दिपक बोहोरा, पाँचथर

पाँचथर जिल्ला फुटबल संघको आयोजनामा जिल्ला फुटबल लिग बिहीबार सुरु हुने भएको छ । अखिल नेपाल फुटबल संघ (एन्फा) को वार्षिक कार्यक्रमअनुसार हुन लागेको लिगमा जिल्लाका ११ टोलीको सहभागिता रहने जिल्ला संघका अध्यक्ष सुजन नेम्बाङले जानकारी दिए । प्रतियोगिता मिक्लाजुङ गाउँपालिका ४ स्थित अमरदिप आधारभुत विद्यालयको खेल मैदानमा हुनेछ ।

जिल्ला लिगमा पाँचथर युनाइटेड क्लब (फिदिम १), सयपत्री युवा क्लब (यासोक),पाथिभरा स्र्पोटिङ क्लब (चोकमागु),टु स्टार क्लब इम्बुङ),राइजिङ स्टार क्लब (रबि),चोलुङ युवा क्लब (याङनाम), पल्लोटार युवा क्लब ( फिदिम २ पल्लोटार),.सुम्हात्लुङ युवा क्लब (फिदिम ४ गडी),रानिटार युनाइटेड (रानिटार),तिजोक युवा क्लब (नवमीडाँडा) ,फिदिम स्र्पोटिङ क्लब (फिदिम १) ले प्रतिस्पर्धा गर्ने बताइएको छ । सहभागी टोलीलाई दुई समूहमा विभाजन गरि राउन्ड रोविनका आधारमा खेलाइने बताइएको छ । जिल्ला लिगको विजेता प्रदेश स्तरको लिगका लागि छनोट हुनेछ ।

रेलिगेसन गर्ने कि नगर्ने मा विवाद

एन्फाले जिल्ला लिग गर्दा रेलिगेसन सहितको गर्नुपर्ने र क्लब स्तरीय नकआउट फुटबल प्रतियोगिता आयोजना गर्नका लागि नयाँ क्लबलाई मौका दिनुपर्ने उल्लेख गरिएको छ । तर बिहीबारदेखि सुरु हुने जिल्ला लिग रेलिगसेन सहित गर्ने वा विनाको गर्ने भन्नेमा संघमा विवाद भएको अध्यक्ष नेम्बाङले स्वीकारे ।

धेरै क्लब र संघका पदाधिकारीहरु रेलिगेसन गर्न नहुने पक्षमा रहेका छन् । संघका अध्यक्ष र केहि क्लबहरुबाहेक अधिकांश रेलिगेसन विनाको लिग गर्नुपर्नेमा जोड दिइरहेको संघ निकट श्रोतले जानकारी दिए । जिल्ला फुटबल संघको निर्वाचन नजिकिदै गर्दा रेलिगेसन सहितको लिग गर्न उपयुक्त नहुने तर्क गर्ने पदाधिकारी पनि रहेको बताइएको छ । तर अध्यक्ष नेम्बाङ भने पुछारमा भएका दुईवटा क्लबलाई रेलिगेसनमा पर्ने र बी डिभिजनमा घटुवा भई नयाँ क्बलले जिल्ला लिग खेल्ने अवसर पाउनु पर्ने पक्षमा आफु रहेको बताउछन् ।

क्लब स्तरीय नकआउट फुटबल प्रतियोगिताको विजेता जिल्ला लिगमा छनोट हुने र लिगको पुछारमा रहेको टिम घटुवा गर्दा नयाँ टिमहरुले पनि लिगमा अवसर पाउनेछ । तर रेलिगेसनसहित नगर्दा लिग गर्नु र नगर्नुको कुनै अर्थ नरहेको नेम्बाङ बताउछन् । कार्य समितिमा आफु अल्पमतमा रहेकाले निणर्य गराउन नसकेको उनले बताए ।

यस पटकको जिल्ला लिग रेलिगेसन विना हुने सम्भावना रहेको जिल्ला फुटबल संघ पाँचथरका उपाध्यक्ष शिव लावतीले बताए । एन्फाको परिपत्र पनि ढिला आयो, अहिले समय पनि कम भएकाले क्लब स्तरीय नकआउट फुटबल प्रतियोगिता आयोजना गर्न जिल्ला फुटबल संघले नसक्ने भएकाले अब रेलिगेसन विनाकै लिग हुने सम्भावना छ । विना रेलिगेसनको लिग भएको खण्डमा लिग नकआउटबाट लिगमा पुग्न चहाने क्लबका लागि भने फेरि पर्खनुपर्ने भएको छ ।