काठमाडौं (हाम्रो खेलकुद)– टोलीको मेहनतका कारण एएफसी कप छनोटमा पुग्न सफल भएको जनाउँदै मछिन्द्र फुटबल क्लबका कप्तान सुजल श्रेष्ठले खुसी व्यक्त गरेका छन् । उनले छनोट पार गर्दै अघि बढ्ने विश्वास समेत व्यक्त गरे ।

‘एएफसी कप छनोट खेल्न पाउँदा अवश्य पनि खुसी लागेको छ । सातौं खेलमा निर्णय भएको छ’, उनले भने, ‘अलिक टोलीमाथि दबाब पनि थियो । तर, सफल भयौं । खुसी छौं । सम्पूर्ण टोलीले मेहनत गरेर यो सफलता प्राप्त गरेका छौं ।’

कतार एअरवेज सहिद स्मारक ए डिभिजन लिगको सातौं चरणको खेलमा आइतबार नेपाल पुलिस क्लबलाई १–० ले हराउँदै मछिन्द्रले एएफसी कप छनोटको यात्रा पक्का गरेको थियो । सातौं चरण जारी रहँदा अपराजित रहेको मछिन्द्रले ७ खेलबाट १७ अंक जोड्यो । मछिन्द्रले ५ जित र २ बराबरीको नतिजा निकालेको छ । मनाङको त्यति नै खेलमा १६ अंक छ ।

मनाङले शनिबार पोखरामा ब्रिगेड ब्वाइज क्लब (बिबिसी) लाई १–० ले हराउँदै एएफसी कप छनोटको सम्भावना जीवित राखेको थियो । तर आइतबार मछिन्द्रको जितसँग मनाङको सम्भावना समाप्त भएको थियो ।

सुजलले २०७६ मा लिग च्याम्पियन भएर पनि एएफसी कप छनोट खेल्न नपाउँदा दुःख लागेको स्मरण गरे । ‘पहिला त्रिभुवन आर्मी फुटबल क्लबले यहाँ एएफसी कप छनोट खेल्दा दुःख लागेको थियो । एएफसी क्लब लाइसेन्स नभएर हामीले जितेर पनि खेल्न पाएनौं’, उनले भने, ‘यसपाली हामीले खेल्न मौका पायौं । यसपटक भगवानले पनि साथ दिनुभएको जस्तो लाग्यो ।’

मनाङमा लामो समय बिताएका सुजलसहित केहि सिनियर खेलाडी मछिन्द्रमा गएकै वर्ष टोलीलाई पहिलो पटक लिग च्याम्पियन बनाएका थिए । तर, क्लब लाइसेन्स नभएका कारण लिग च्याम्पियन मछिन्द्रको सट्टा आर्मीले एएफसी कप छनोट खेलेको थियो । आर्मी पहिलो चरण पार गर्न सफल भएको थियो । आर्मीपछि यसै वर्ष मछिन्द्र, मनाङ र एपिएफ फुटबल क्लबले क्लब लाइसेन्स प्राप्त गरेका हुन् । यसपटक यिनै चार टोली मात्र एएफसी कप छनोटको दौडमा थिए । आर्मी र एपिएफ पहिला नै छनोटको सम्भावना बाट बाहिरिएका थिए । सातौं चरण सम्म आइपुग्दा मनाङ र मछिन्द्रबीच मात्र प्रतिस्पर्धा थियो, जसमा मछिन्द्रले बाजी मारेको छ ।

एएफसी छनोटको पहिलो चरणका बारेमा बोल्दै सुजलले भने, ‘अब कुन टिम सँग पर्ने निर्णय भइसकेको छैन जस्तो लाग्यो । टिम हेरौं पहिला । हाम्रो टिम राम्रो छ । सिनियर र युवा खेलाडी मिलेर बनेको टोली छ । मेरो विचारमा हामी अगाडि बढ्छौं जस्तो लाग्छ ।’

उनले एएफसी कप छनोट सहज भने पक्कै नहुने बताएका छन् । पहिलो चरणमा श्रीलंका र भुटानका टोलीको सामना गर्नुपर्ने हुन सक्छ । त्यसमा छनोट भएमा बंगलादेश र भारतका लिग च्याम्पियन टोलीको सामना गर्नुपर्ने हुन्छ । ‘अवश्य पनि अप्ठेरो हुन्छ । श्रीलंका र भुटान फरक टिम हुन्छ’, उनले भने, ‘त्यसपछिका बंगलादेश र भारत अर्को स्तरका छन् । फरक त पर्छ ।’