काठमाडौं (हाम्रो खेलकुद)– मछिन्द्र फुटबल क्लबका प्रशिक्षक प्रवेश कटुवालले एएफसी कप छनोटका लागि टोलीमा विदेशी खेलाडी थप्ने बताएका छन् ।

सातौं चरणको खेलमा आइतबार नेपाल पुलिस क्लबलाई १–० ले हराएपछि मनाङ मर्स्याङ्दी क्लबलाई पछि पार्दै मछिन्द्र एएफसी कपको लागि छनोट भएको हो । सातौं चरण जारी रहँदा अपराजित रहेको मछिन्द्रले ७ खेलबाट १७ अंक जोड्यो । मछिन्द्रले ५ जित र २ बराबरीको नतिजा निकालेको छ । मनाङको त्यति नै खेलमा १६ अंक छ ।

‘एएफसी कपका लागि विदेशी खेलाडी थप्छौं । बलियो बनाएर जान्छौं । त्यसमा नेपाली खेलाडीको संयोजन गरेर जान्छौं’, कटुवालले छनोटपछि भने, ‘अन्य क्लबबाट नेपाली खेलाडी आबद्ध गर्ने भने योजना छैन ।’

कटुवालले दबाबका बीच पनि सफलता निकाल्न सकेकोमा खुसी व्यक्त गरे । ‘दबाबको खेल थियो । केहि खेलाडी घाइते र केहि प्रतिबन्धमा भएकाले हामीलाई गाह्रो थियो’, उनले भने, ‘जित्यौं खुसी र सन्तुष्ट छौं ।’

उनले सात चरणको खेल सहज नभएको पनि बताए । ‘सबै टोली राम्रो थिए त्यसले हामीलाई यो यात्रा सहज थिएन । पुलिसले पनि राम्रो खेल्यो’, कटुवालले थपे, ‘सुरुमा गोल निस्कियो । त्यसलाई जोगाउने र काउन्टरमा थप्ने प्रयास गरेका थियौं । त्यसमा हामी सफल भयौं ।’

कटुवालले टोलीमा अझै धेरै सुधार गर्नुपर्नेमा पनि जोड दिएका छन् । ‘फुटबल टिम वर्क हो । कम्बिनेसन अझै मिल्न बाँकी छ’, उनले भने, ‘सुधार गर्नुपर्ने धेरै छन् । लामो समय सँगै खेल्दा आपसी समन्वय मिल्दै जाने हो ।’

पुलिसका प्रशिक्षक अनन्त थापाले एउटा गोललाई छाड्ने हो भने आफ्नो टोलीको प्रदर्शन सन्तोषजनक रहेको बताए । सुनिल बलको निर्णायक गोलमा मछिन्द्र विजयी भएको थियो । त्यसमा आफ्नो टोलीको केहि कमजोरी रहेको पनि प्रशिक्षक थापाले स्वीकार गरे । ‘डिफेन्स लाइनमा कसैले लिड गर्नुपर्छ । हाम्रो फस्ट बारमा ध्यान भएन, त्यसमै गोल खायौं । तर समग्रमा हामीले राम्रो खेल्यौं ।’

सुमन लामाको फ्रिकिक बारमा लागेर फर्कनु टोलीको दुर्भाग्य रहेको उनले सुनाए । ‘हामीले दास्रो हाफमा बराबरीको प्रयास पनि गर्यौं । सुमनको प्रहार इन्साइड बारमा लागेर फर्कियो’, उनले भने, ‘त्यस्तो पनि गोल भएन । मछिन्द्रले एएफसी खेल्ने लेखेकै जस्तो लाग्यो । राम्रो फाइट दियौं । खेलाडीलाई दिएको जिम्मेवारी दिएका थियौं गोलबाहेक सबै राम्रो भयो । अझ उनीहरु भन्दा राम्रो गरेका थियौं ।’

थापाले योजना सुनाउँदै भने, ‘सुरक्षित भएर खेल्ने भन्ने थियो । त्यहि गोलले फरक पर्यो । आजको प्रदर्शनले सकारात्मक महसुस भएको छ । आज राम्रो गछौं र सुरक्षित भएर लिग सकाउँछौं ।’