काठमाडौं (हाम्रो खेलकुद)– मनाङ मस्र्याङ्दी क्लबले एएफसी कप छनोटको सम्भावनालाई जीवित राखेको छ । पोखरा रंगशालामा शनिबार ब्रिगेड ब्वाइज क्लब (बिबिसी) लाई १–० ले हराउँदै मनाङले एएएफसी कप छनोटको सम्भावना कायम गरेको हो ।

कप्तान अन्जन विष्टले पहिलो हाफमा गरेको गोलमा मनाङ लिगमा पाँचौं जित दर्ता गरेको हो । जितसँगै मनाङ अंक तालिकाको शीर्षस्थानमा उक्लेको छ भने मछिन्द्र फुटबल क्लब दोस्रो स्थानमा झरेको छ । मनाङको १६ अंक पुगेको छ । मछिन्द्रको १४ अंक छ ।

एएफसी कप छनोटमा पुग्नका लागि मछिन्द्रले आइतबार हुने खेलमा नेपाल पुलिस क्लबलाई हराउनै पर्ने हुन्छ । मछिन्द्र पराजित भए वा बराबरीमा रोकिएको खण्डमा मनाङले एएफसी कपमा देशको प्रतिनिधित्व गर्नेछ । सातौं चरणको समाप्तीमा एएफसी क्लब लाइसेन्स प्राप्त क्लबमध्ये लिगको माथिल्लो स्थानमा रहने टोलीले एएफसी कप छनोट खेल्ने अखिल नेपाल फुटबल संघ (एन्फा) ले यसअघि नै सार्वजनिक गरेको थियो ।

पहिलो हाफको इन्जुरी समयमा फ्रिकिकमा आएको बलमा अन्जनले हेड गोल गर्दै मनाङलाई अग्रता दिलाएका थिए । सोही गोल खेलको निर्णयक बनेको थियो । १७औं पेनाल्टी चुकाउँदा बिबिसीले सुरुवाती अग्रता लिनाट चुकेको थियो । शिशिर लेखीले पेनाल्टी चुकाएका थिए ।मनाङले आठौं चरणको खेल अर्को शनिबार च्यासल युथ क्लबसँग पोखरा रंगशालामा नै खेल्ने छ ।

शनिबार दशरथ रंगशालामा भएको अर्को खेलमा थ्री स्टार क्लबले जावलाखेल युथ क्लबलाई २–१ ले हराएको थियो । जितसँगै थ्री स्टार १० अंकका साथ पाँचौं स्थानमा उक्लेको छ । शनिबार नै हुने अर्को खेलमा संकटा क्लब र च्यासल युथ क्लबबीच प्रतिस्पर्धा हुनेछ ।