मनमोहन दुहवी गोल्डकप शनिबार सुरु हुने

काठमाडौं (हाम्रो खेलकुद) – मनमोहन दुहवी गोल्डकप फुटबल प्रतियोगिता शनिबारबाट दुहवी भालुवामा सुरु हुँदैछ । नेपाल, भारत र भुटानका ८ टोलीको सहभागिता रहने प्रतियोगिता मंसिर १८ गते सम्म सञ्चालन हुने बुधबार पत्रकार सम्मेलनमा जानकारी दिइयो ।

प्रतियोगिता मनमोहन स्मृती प्रतिष्ठान तथा एलेभन एरोज क्लबको संयुक्त आयोजनामा हुन लागेको हो । आफ्नो स्थापनाको पाँच दशक पुरा भएको उपलक्ष्यमा एलेभन एरोज क्लबले मनमोहन स्मृती प्रतिष्ठानसँगको सहकार्यमा प्रतियोगिता आयोजना गर्न लागेको हो ।
आयोजक समितिका सदस्य दीलिप राईका अनुसार प्रतियोगितामा लक्ष्मी हुन्डाई मनाङ मस्र्याङ्दी क्लब, त्रिभुवन आर्मी क्लब, रमपम झापा ११, चर्च ब्वाइज क्लब, विआरसी भुटान क्लब, शेरे क्लब कालिङपोङ भारत, मोरङ फुटबल क्लब, एलेभेन एरोज क्लब दुहवी गरी आँठ टोलीको सहभागिता रहने बताइएको छ ।
प्रतियोगिताको विजेता टोलीले उपाधिसहित ३ लाख र दोस्रो हुने टोलीले १ लाख ५० हजार रुपैयाँ प्राप्त गर्नेछन् । आर्मी क्लब र चर्च ब्वाइजबीच शनिबार उद्घाटन खेल हुनेछ । झापा र आयोजक एलेभन एरोजबीच आइतबार, मोरङ र बिआरसी तथा सोमबार शेर फुटबल र मनाङबीच प्रतिस्पर्धा हुनेछ ।