काठमाडौं (हाम्रो खेलकुद) – फरवार्ड सन्तोष साहुखल च्यासल युवा क्लबबाट ए डिभिजन लिग खेल्न जापानबाट नेपाल आइपुगेका छन् ।

विहीबार नेपाल आइपुगेका उनी शनिबारको खेलका लागि उपलब्ध रहेको टोलीका व्यवस्थापक शंकर व्यनजनकारले जानकारी दिए । ‘सन्तोष हिजो आइपुगेका हुन् । आज टोलीसँग प्रशिक्षण पनि गरे । उनको आगमनले टोलीको मनोबल बढेको छ । शनिबारको लागि उपलब्ध हुन्छन्,’ ब्यन्जनकारले हाम्रो खेलकुदसँग भने ।

गत सिजन च्यासलबाट नै खेलेका सन्तोषले ए डिभिजन लिगमा १ सय गोलको आँकडा पूरा गरेका थिए । च्यासलले यस सिजन उनी टोलीमा रहने अपेक्षा सहित नै लिगको तयारी गरेको थियो । तर कोरोना संक्रमण र विविध मापदण्डका कारण उनी समयमा आउन सकेका थिएनन् । उनले शनिबार संकटाविरुद्ध खेलमा खेल्ने बलियो सम्भावना रहेको छ ।

लिगको सुरुवातमा नै च्यासलका प्रशिक्षक तथा सन्तोषका दाजु बालगोपाल साहुखलले टोलीको आक्रमण उनले नै सम्हाल्ने बताएका थिए । सन्तोषको आगमनले टोलीको आक्रमण बलियो हुने पक्का छ । हाल टोलीमा सुसन लामा, राजीव लोप्चन र इटालियन विकास मेराग्लियाले आक्रमण सम्हाल्दै आएका थिए । कर्ण लिम्बु पनि पछिल्लो दुई खेलदेखि पहिलो रोजाइमा रहेका छन् ।

च्यासल लिगमा सर्वाधिक कम गोल गर्ने टोलीमा पर्दछ । टोलीका लागि सबै गोल मिडफिल्डर रुमेश बर्तौलाले नै गरेका छन् । उनले लिगको ३ खेलमा सुरुवात तथा २ खेलमा वैकल्पिक खेलाडीका रुपमा खेल्दै कुल २ सय ६८ मिनेट खेलेका छन् । आर्मीविरुद्ध चौथो खेलमा चोट बोकेपछि उनले जावलाखेलविरुद्ध खेल गुमाएका थिए । शेर्पाविरुद्ध पहिलो हाफमा नै मैदान प्रवेश गर्दै उनले पुनरागमन गरेका थिए । उक्त खेलमा ३-१ को हार बेहोरेपनि उनले एकमात्र गोल गरेका थिए ।

च्यासलले लिगको ६ खेलमा १ जित र १ बराबरीको नतिजा निकाल्दा ३ खेलमा हार बेहोरेको छ । दोस्रो खेलमा एपिएफलाई १-० ले हराएको च्यासलले तेस्रो खेलमा एनआरटीसँग १-१ को बराबरी खेल्दै अंक खोसेको थियो । त्यसयता टोलीले लगातार तीन खेलमा हार बेहोरेको छ ।

यो पनि : दुर्लभ इतिहास अनि सरल सन्तोष