लमजुङ (हाम्रो खेलकुद) – साविक विजेता श्री भगवथी युवा क्लब टोखा काठमाडौं र लाली गुराँस युवा क्लब लमजुङमा जारी जिल्लाकै सर्वाधिक धनराशिको २९औं संस्करणको त्रिवेणी कप राष्ट्रव्यापी फुटवल प्रतियोगिताको क्वाटरफाइनलमा प्रवेश गरेका छन् ।

लमजुङ सदरमुकाम बेंसीशहरस्थित सहजी खेल मैदानमा शुक्रबार भएको प्रि–क्वाटरफाइनलमा श्री भगवतीले श्री जंग गणलाई ८–७ ले पराजित गर्दै अन्तिम आठमा स्थान पक्का गरेको हो । ट्राइब्रेकरमा श्री भगवतीका उर्केन शेर्पा, साहिल केसी, अर्मान विन डोउम र योगेश लिम्बुले गोल गर्दा सागर स्याङ्तान गोल गर्न सकेनन् ।

श्री जंगका सतिस राज धामी, हेमराज थानी, भुपेन्द्र जंग रायमाझी र चेतन केसीले गोल गर्दा लक्ष्मण दुराले गोल गर्न सकेनन् । त्यसपछि सडन डेथमा श्री भगवतीका असनल खड्का, उत्तम शाही, अनिष श्रेष्ठ र जिनाहुआ मोइसले गोल गरे ।

श्री जंगका भीम विक, दोर्जे तामाङ विनय महतले गोल गर्दा गोपाल शाक्य चुके । त्यसअघि निर्धारित समयको खेल १–१ गोलको बराबरीमा सकिएपछि खेल ट्राईब्रेकरमा लम्विएको थियो । खेलको तेस्रो मिनेटमा श्री जंगका सुवास लामा बोम्जनले गोल गरेका थिए । श्री भगवतीका जिनाहुआ मोइसले ७०औं मिनेटमा बराबरी गोल फर्काएका थिए ।

अर्काे खेलमा लाली गुराँस युव क्लबले लमजुङ मस्र्याङ्दी युवा क्लबलाई ट्राइब्रेकरमा ५–३ ले पराजित गर्दै क्वाटरफाइनलमा स्थान पक्का गरेको छ । निर्धारित समयको खेल गोलरहित बराबरीमा सकिएपछि खेलको निर्णय ट्राइब्रेकरबाट लिइएको थियो । लाली गुराँसका सुमित श्रेष्ठ, घनश्याम तामाङ, क्षितिज जिटी, विश्व थापा र प्रयास तामाङले गोल गर्दा लमजुङका जाहाँ, म्याक्सवेल, उमेश थापाले गोल गर्दा अजय चौधरीले गोल गर्न सकेनन् ।

अर्काे खेलमा समाज कल्याणले न्यु आदर्श क्लबलाई २–० ले पराजित गर्दै अघिल्लो चरणमा प्रवेश गरेको छ । समाज कल्याणको जितमा याओ कुआएसीले खेलको पहिलो मिनेटमा तथा एलेन फुइन्टेसले १६औं मिनेटमा गोल गरे ।

प्रतियोगितामा लमजुङ, काठमाडौ, पोखरा, चितवन, तनहुँलगायत जिल्लाबाट गरी १८ टिमको सहभागिता रहेको छ । त्रिवेणी रंगशालामा १ हजार २ सय जना दर्शक क्षमताको प्याराफिट निर्माण गरिएको छ । प्याराफिटमा बसेर खेल अवलोकन गनए ५० रुपैयाँ शुल्क लिने आयोजकले जनाएको छ । कोरोना संक्रमण जोखिमका कारण गतबर्ष त्रिवेणी कप स्थगित भएको थियो ।

यसबर्षको त्रिवेणी कपको विजेताले ५ लाख, त्रिवेणी कप र स्वर्ण पदक प्राप्त गर्नेछ । उपविजेताले ३ लाख र रजत पदक पाउनेछ । सेमिफाइनल पराजित हुने दुई टोलीले समान ५०–५० रुपैया प्रदान गरिने आयोजकले जनाएको छ । सर्वाधिक गोलकर्ता र सर्वोत्कृष्ट खेलाडीले जनही १५–१५ हजार रुपैयाँ प्रदान गरिनेछ । त्रिवेणी कप २० पुससम्म सञ्चालन हुनेछ ।