काठमाडौं (हाम्रो खेलकुद) – एपिएफ सहारा सुरुङ्गा गोल्ड कप फुटबल प्रतियोगिता उपाधिको नजिक पुगेको छ । घरेलु फुटबलको सफलमध्ये विभागिय टोली नेपाल पुलिस क्लबलाई बुधबार टाइब्रेकरमा ५–४ ले हराउँदै एपिएफले प्रतियोगिताको फाइनलमा पुगेको हो । अब लक्ष्मी हुन्डाई मनाङ मस्र्याङ्दी र रुपन्देही ११ बीचको विजेतासँग एपिएफले फाइनल खेल्नेछ । मनाङ र रुपन्देहीबीच बिहीबार दोस्रो सेमिफाइनल खेल हुनेछ ।

कनकाई माविको खेल मैदानमा भएको विभागिय डर्बीको निर्धारित ९० मिनेटको खेल गोलरहित बराबरीमा टुंगिएको थियो । त्यसपछिको टाइब्रेकरमा एपिएफले सफलता प्राप्त गरेको थियो । पेनाल्टीमा एपिएफका नविन लामा, आदित्य चौधरी, मिलन राई, पासङ लामा र रञ्जन विष्ट गोल गर्न सफल भए । पुलिसका विक्रम धिमाल, दिनेश गुरुङ, तेज तामाङ र दिनेश राजवंशीले पेनाल्टीमा गोल गरे गोल गरे । बुद्ध लामाले पेनाल्टी खेर फाले । एपिएफका राजेन्द्र रावल म्यान अफ दी म्याच घोषित भएका थिए ।
नेपाली राष्ट्रिय फुटबल टोलीका मुख्य प्रशिक्षक जापानी ग्योटोकु कोजी पनि खेल हरेका थिए । सुरुङ्गा जेसिजले आयोजना गरेको प्रतियोगिताको विजेताले ३ लाख ५१ हजार १ सय ११ तथा दोस्रो हुने टोलीले २ लाख ५१ हजार १ सय ११ रुपैयाँ प्राप्त गर्नेछ ।