काठमाडौं (हाम्रो खेलकुद)– दुई विभागिय टोलीले एकअर्काको सामना गर्दा कतार एअरवेज सहिद स्मारक ए डिभजिन लिगमा शुक्रबार सातौं चरणको सुरुवात हुँदैछ । त्रिपुरेश्वरस्थित दशरथ रंगशालामा दिउँसो १ः०० बजे एपिएफ फुटबल क्लब र त्रिभुवन आर्मी फुटबल क्लबबीच प्रतिस्पर्धा हुँदैछ ।

दुई विभागिय टोलीको अवस्था फरक छ। आर्मी शीर्षस्थानका लागि प्रयासरत रहँदा एपिएफ भने पुनः रेलिगेसन दबाबमा नपर्नका लागि सचेत छ । एएफसी कप छनोटबाट बाहिरिसकेको आर्मीको अबको लक्ष्य भनेको उपाधि जित्नेमा मात्र केन्द्रित छ ।

६ खेलमा टोली अपराजित रहँदै आर्मीले १० अंक जोडेको छ । २ खेल मात्र जितेको टोलीले ४ खेलमा भने बराबरी खेलेको थियो । लिगमा अपराजित ३ टोलीमध्ये एक आर्मी हो । शीर्षस्थानको मछिन्द्र फुटबल क्लब (१४ अंक) , तेस्रो स्थानको संकटा क्लब (१२ अंक) पनि छैटौं चरणको समाप्तीम सम्ममा अपराजित छ ।

दोस्रो स्थानको मनाङ (१३ अंक) भने छैटौं चरणको खेलमा मछिन्द्रसँग १–० ले पराजित भएको थियो । अर्कोतर्फ सुरुवाती ३ खेलमा पराजित एपिएफ पछिल्ला ३ खेलमा अपराजित रहेको छ । टोलीले ३ खेलमा २ बराबरी र १ जितका साथ ५ अंक जोडेको छ । एनआरटीसँग बराबरी खेल्नुअघि टोलीले फ्रेन्ड्स क्लबलाई ३–१ ले पराजित गरेको थियो ।

शुक्रबार ४ः४५ बजे फ्रेन्ड्स क्लब र एनआरटीबीच प्रतिस्पर्धा हुनेछ । फ्रेन्ड्स ३ अंकका साथ अंकतालिकाको पुछारमा छ । एनआरटी ७ अंकसहित आठौं स्थानमा छ ।