काठमाडौं (हाम्रो खेलकुद)– राष्ट्रिय फुटबल टोलीका मुख्य प्रशिक्षक अब्दुल्ला अलमुताइरी मंगलबार नेपाल आइपुगेका छन् । पछिल्लो सम्झौता प्रारम्भ हुन केहि दिन बाँकी रहँदा उनी नेपाल फर्केका हुन् । झण्डै दुई महिना देखि उनी नेपाल बाहिर थिए । राष्ट्रिय क्रिकेट टोलीका नवनियुक्त प्रशिक्षक पबुदु दसानायके पनि मंगलबार नै नेपाल आइपुगेका थिए ।

असोजमा माल्दिभ्समा भएको साफ च्याम्पियनसिपपछि उनी टोलीसँग नफर्की कतार गएका थिए । कतारमै रहँदा सन् २०२२ जनवरी १ देखि २०२४ सम्म नेपाली राष्ट्रिय टोलीको प्रशिक्षण सम्हाल्ने गरि उनले सम्झौता गरेका थिए । कतार फुटबल संघको सहयोगमा उनी नेपाल आएका हुन् ।

नयाँ सम्झौतापछि कात्तिकमा नेपाल आएर उनी पुनः कतार फर्केका थिए । कात्तिक १६ गते पत्रकार सम्मेलनमा अलमुताइरीले विश्वकप छनोट २०२६ र एसिया कप छनोट २०२७ लाई लक्षित गरेर तीन वर्षको सम्झौता गरिएको बताएका थिए ।

अलमुताइरीले आफुले तीन चरणमा काम गर्ने भन्दै त्यसको योजना सार्वजनिक गरेका थिए । पहिलो चरणमा एसिया कप छनोट रहेको छ । जस अन्तर्गत राष्ट्रिय टिमको प्रशिक्षण र मैत्रीपूर्ण फुटबल खेलको तालिका योजनामा रहेका छन् ।

उनले ‘ए’ डिभिजन लिग, नेपाल सुपर लिगको बाट खेलाडी छनोट गरिने बताएका थिए । अलमुताइरीको प्रशिक्षणमा नेपालले अहिले सम्म ११ खेल खेल्दा ३ जित, २ बराबरी र ६ हारको नतिजा निकालेको छ । अलमुताइरीको प्रशिक्षणमा नेपाल पहिलो पटक साफ च्याम्पियनसिपको फाइनल पुगेको थियो ।

अर्को महिना फिफा डेटमा नेपालले मैत्रीपूर्ण खेल खेल्ने र त्यसका लागि अलमुताइरीले केहि दिनमा प्रशिक्षण सुरु गर्ने एन्फाका केन्द्रिय सदस्य एवंम् राष्ट्रिय टोलीका प्रशिक्षक मधुसुदन उपाध्यायले जानकारी दिए ।