काठमाडौं (हाम्रो खेलकुद)– मछिन्द्र फुटबल क्लबका फरवार्ड रेजिन सुब्बा उपचारका लागि व्यक्तिगत खर्चमा कतार पुगेका छन् ।

कोरोना महामारी र त्यसपछिको चोटका कारण झण्डै २ वर्षदेखि मैदान बाहिर रहेका रेजिनको दायाँ कुर्कुच्चाको चोट पूर्ण रुपमा ठीक नभएपछि उनी उपचारका लागि कतारस्थित विश्वप्रसिद्ध अस्पेटार अस्पताल पुगेका हुन् । त्यो त्यहि अस्पताल हो जहाँ अहिले पनि राष्ट्रिय महिला टोलीकी फरवार्ड सावित्रा भण्डारी उपचार गराइरहेकी छिन् । थ्री स्टार क्लबका कप्तान विक्रम लामा र विमल घर्तीमगर उपचार गराएर फर्केर अहिले सहिद स्मारक ए डिभिजन लिग खेलिरहेका छन् ।

अखिल नेपाल फुटबल संघ (एन्फा) को पहलमा उपचारका लागि छ सात महिना कुर्नुपर्ने भएपछि तत्काल मैदान फर्कन सकिन्छ कि भन्ने उद्देश्यका साथ उपचारका लागि कतार गएको रेजिनको व्यवस्थापकिय जिम्मेवारी समेत निर्वाह गरिरहेका नातेदार अर्जुन कार्कीले जानकारी दिए ।

एन्फा महासचिव इन्द्रमान तुलाधरका अनुसार रेजिनको उपचारका लागि एन्फाले सक्दो सहयोग गरेको छ । ‘हामीले वार्षिक २ खेलाडी उपचार गराउन पठाउने हो । अब यस वर्ष त्यो कोटा छैन । त्यहाँ नै एन्फाबाट उपचार गराउन ६-७ महिना कुर्नुपर्ने अवस्था छ,’ तुलाधरले भने, ‘उनले आफैं जाने भनेपछि आवश्यक कागजात प्रदान गरेका छौं ‌‌। भिसा प्रक्रियामा आवश्यक सहयोग गरेका छौं ।’

गत साता कतार पुगेका रेजिनले ७ दिन क्वारेन्टिनमा बिताएपछि सोमबार एमआरआई गराएका छन् । एमआरआईबाट उनको कुर्कुच्चाको सफ्ट टिस्यूमा चोट देखिएको र त्यसकै कारण दुःखाई भएको डाक्टरहरुले बताएको कार्कीले जानकारी दिए । राष्ट्रिय यू २३ को प्रशिक्षणका दौरान रेजिनको घुँडामा चोट लागेको थियो ।

परिक्षण पछि उनलाई ग्राउन्ड रिह्याब गराउनुपर्ने डाक्टरहरुको सल्लाह दिएको जनाउँदै कार्कीले भने, ‘अब केहि दिनमा ग्राउन्ड रिह्याब सुरु हुन्छ । उनको चोटमा कसरी सुधार हुन्छ । उसको शरीररले त्यसलाई कसरी रेस्पोन्स गर्छ । त्यहि आधारमा चोट निको हुने बताइएको छ । जसले हामीलाई उत्साहित पनि बनाएको छ । अहिले प्रारम्भिक चरणमा २ देखि ३ साता सम्म लाग्न सक्ने अनुमान गरिएको छ ।’

१३ औं दक्षिण एसियाली खेलकुद (साग) मा स्वर्ण पदक जित्दाको पुरस्कार रकम, अन्य पुरस्कार, पारिश्रमिक र अन्य सञ्चित रकमबाट उपचार गराउनका लागि रेजिन कतार पुगेको पनि कार्कीले बताए ।

‘राम्रो खेलाडी लामो समय मैदान बाहिर बस्दा निराश पनि हुन्छ, एन्फाका पनि आफ्ना कठिनाई होला’, उनले भने, ‘हामी उनलाई छिटो भन्दा छिटो मैदानमा फर्काउन चाहन्छौं । त्यसैले हामीले आफ्नै खर्चमा भएपनि उचार गर्नुपर्छ भन्ने निधोमा पुगेका हौं । सात आठ लाख रुपैयाँ खर्च हुने अनुमान गरेका छौं ।’

रेजिनको उपचारका लागि मछिन्द्रका व्यवस्थापनदेखि खेलाडी सबैको सकारात्मक सहयोग रहेको पनि कार्कीले जानकारी दिए । ‘क्लबबाट एकदमै साथ पाएकोले पनि रेजिन हौसिएका हुन्, आशा गरौं चाँडै निको भएर फर्कनेछन् ।’

रेजिनले पनि लिगका अन्तिम चरणका केहि खेल खेल्न सकिन्छ कि भन्ने आशा गरेका छन् ।