काठमाडौं (हाम्रो खेलकुद) – दुई छिमेकी सातदोबाटो युथ क्लब र जावलाखेल युथ क्लबले कतार एअरवेज सहिद स्मारक ‘ए’ डिभिजन लिगमा अन्तरगतको छैटौ चरणको खेलका पहिलो हाफमा बराबरी खेलेका छन् । पहिलो हाफ गोलरहित बराबरीमा सकिएको हो ।

त्रिपुरेश्वरस्थित दशरश रंगशालामा सोमबार भएको खेलमा बल पोसेसनमा पकड बनाएपनि सातदोबाटोले जावलाखेलको बलियो रक्षापङ्ति तोड्न सकेको छैन ।

पहिलो हाफको इन्ज्युरी समयको थप गरिएको पहिलो ओनगुना जुनियरको हेडरलाई गोलरक्षक अभिषेक बरालले बचाउँदा जावलाखेल अग्रता लिनबाट चुक्यो ।

रेलिगेसन क्षेत्रबाट एक स्थान माथि रहेको जावलाखेल अंक तालिकामा थप सुधारका लागि प्रयासरत रहँदा सातदोबाटो भने तेस्रो खेलमा पहिलो जितका लागि संघर्ष गर्नेछ । जावलाखेलले पाँचौं चरणको खेलमा पहिलो जित दर्ता गराएर आफूलाई रेलिगेसन क्षेत्रबाट बाहिर निकालेको थियो । यद्दपी टोलीमाथि दबाब भने यथावत छ । च्यासल युथ क्लबलाई १–० ले हराएको खेलमा जावालखेलले जारी लिगमा पहिलो गोल गरेको थियो ।

नवप्रवेशी सातदोबाटोको प्रदर्शन भने सन्तोषजना रहँदै आएको छ । पछिल्ला ५ खेलमा टोलीले २ जित, २ बराबर र १ हारका साथ ८ अंक जोडेको छ । टोली पाँचौं स्थानमा रहेको छ । पछिल्ला दुई खेलमा एनआरटीसँग १–० ले पराजित सातदोबाटोले आर्मीसँग १–१ को बराबरी खेलेको थियो । ५ अंकसहित जावलाखेल अंकतालिकाको १२ औं स्थानमा छ ।