काठमाडौं (हाम्रो खेलकुद)– कतार एअरवेज सहिद स्मारक ए डिभिजन लिगको छैटौं चरणको अन्तिम खेलमा सोमबार दुई छिमेकी सातदोबाटो युथ क्लब र जावलाखेल युथ क्लबबीच प्रतिस्पर्धा हुँदैछ । दशरथ रंगशालामा हुने खेल दिउँसो १ः०० बजे सुरु हुनेछ ।

रेलिगेसन क्षेत्रबाट एक स्थान माथि रहेको जावलाखेल अंक तालिकामा थप सुधारका लागि प्रयासरत रहँदा सातदोबाटो भने तेस्रो खेलमा पहिलो जितका लागि संघर्ष गर्नेछ । जावलाखेलले पाँचौं चरणको खेलमा पहिलो जित दर्ता गराएर आफूलाई रेलिगेसन क्षेत्रबाट बाहिर निकालेको थियो । यद्दपी टोलीमाथि दबाब भने यथावत छ । च्यासल युथ क्लबलाई १–० ले हराएको खेलमा जावालखेलले जारी लिगमा पहिलो गोल गरेको थियो ।

नवप्रवेशी सातदोबाटोको प्रदर्शन भने सन्तोषजना रहँदै आएको छ । पछिल्ला ५ खेलमा टोलीले २ जित, २ बराबर र १ हारका साथ ८ अंक जोडेको छ । टोली पाँचौं स्थानमा रहेको छ । पछिल्ला दुई खेलमा एनआरटीसँग १–० ले पराजित सातदोबाटोले आर्मीसँग १–१ को बराबरी खेलेको थियो । ५ अंकसहित जावलाखेल अंकतालिकाको १२ औं स्थानमा छ ।

छैटौं चरणको समाप्ती हुँदै गर्दा मछिन्द्र फुटबल क्लब १४ अंकसहित शीर्षस्थानमा रहेको छ । मनाङ मस्र्याङ्दी क्लबलाई शनिबार १–० ले हराउँदै मछिन्द्र शीर्षस्थानमा उक्लेको हो । अब एएफसी कप छनोटको दौडमा शीर्ष स्थानको मछिन्द्र र ११ अंकसहित दोस्रो स्थानमा रहेको मनाङ मात्र रहेका छन् ।

आइतबार थ्री स्टार क्लबसँग गोलरहित बराबरीमा रोकिएसँगै त्रिभुवन आर्मी फुटबल क्लबको एएफसी कप छनोट खेल्ने सम्भावना समाप्त भएको थियो । आइतबार नै ब्रिगेड ब्वाइज क्लबलाई ३–० ले हराउँदै संकटा १२ अंकका साथ अंक तालिकाको तेस्रो स्थानमा उक्लेको छ । छैटौं चरणका अन्य खेलमा हिमालयन शेर्पा क्लबले च्यासललाई ३–१ ले हरायो, एपिएफ फुटबल क्लब र न्यूरोड टिम एनआरटीले ३–३ को बराबरी तथा नेपाल पुलिस क्लब र फ्रेन्ड्स क्लबले गोलरहित बराबरी खेलेका थिए ।