काठमाडौं (हाम्रो खेलकुद) – रुस्लान थ्री स्टार क्लबसँग बराबरीमा रोकिएसँगै विभागीय त्रिभुवन आर्मी फुटबल क्लबको एएफसी कप छनोट खेल्ने सम्भावना सकिएको छ । आइतबार भएको खेलमा आर्मीले थ्री स्टारसँग गोलरहित बराबरी खेल्दै अंक बाँडेपछि आर्मीको सम्भावना सकिएको हो ।

अब छनोटको दौडमा मछिन्द्र र मनाङमात्रै रहेका छन् । एएफसी कपको छनोट खेल्ने सम्भावनालाई जीवित राख्न कम्तीमा थ्री स्टारविरुद्ध आर्मीलाई जितको खाँचो थियो । तर, आर्मीले नतिजा आफ्नो अनुकुल निकाल्न सकेन । अब सातौ चरणमा मनाङले बिबिसीसँग पोखरामा तथा मछिन्द्रले पुलिससँग काठमाडौंमा खेल्नेछ ।

गत सिजन च्याम्पियन भएको मछिन्द्रको एएफसी क्लब लाइसेन्स नभएपछि दोस्रो भएको आर्मीले एएफसी कप खेल्ने मौका पाएको थियो । आर्मीले दोस्रो चरणको यात्रा तय गरेको थियो ।

त्रिपुरेश्वरस्थित दशरथ रंगशालामा भएको कतार एअरवेज सहिद स्मारक ‘ए’ डिभिजन लिगमा प्रतिस्पर्धात्मक बनेको खेलमा दुवै टोलीले गोलका केही अवसर खेर फाल्दा खेल गोलरहित बराबरीमा सकिएको हो । खेलको १५औं मिनेटमा दिनेश हेन्जनको हेडर बाहिरियो । १७औं मिनेटमा आयुष घलानको प्रहार पहिलो बार च्याप्दै बाहिरिदा थ्री स्टार अग्रता लिनबाट चुक्यो ।

३६औं मिनेटमा सन्तोष तामाङको फ्रिकिकमा पदम बहादुर तामाङको प्रहार पोलमा लागेर फर्कदा र रिवाउन्डमा विकास तामाङको प्रहार आकासिदा आर्मी अग्रता लिनबाट चुक्यो । पहिलो हाफको इन्ज्युरी समयको थप गरिएको पहिलो मिनेटमा दिनेश हेन्जनले वान भर्सेस वानको अवस्थामा पाएको मौकालाई प्रहार नगरी पास दिदा राफयल रिमगागोले क्लियर गर्दै थ्री स्टारको संकट टारे । लगत्तै कर्नरबाट आएको बलमा जगजित श्रेष्ठको प्रहार दोस्रो बार च्याप्दै बाहिरियो ।

८३औं मिनेटमा टेक बहादुर बुढाथोकीले फ्रि हेडर आकासिदा आर्मी अग्रता लिन बाट चुक्यो । इन्ज्युरी समयको थप गरिएको दोस्रो मिनेटमा सुसान श्रेष्ठको क्रसमा डोना थापाको प्रहारलाई डिफेन्डरले ब्लक गरे । रिवाउन्डमा रितिक कुमार खड्का र कप्तान विक्रम लामा जुध्न पुग्न मिक्चेन तामाङको प्रहार बाहिरियो । त्यसपछि थप गोल निस्कन नसक्दा खेल गोलरहित बराबरीमा टुंगियो ।

यो बराबरीसँगै अपराजित रहेको आर्मी ६ खेलबाट १० अंक जोडेर चौथो स्थानमा झरेको छ । आइतबार संकटाले बिबिसीलाई ३–० ले पराजित गर्दै तेस्रो स्थानमा उक्लन सफल भएको थियो । चौथो बराबरी खेलेको थ्री स्टारको ६ खेलबाट ७ अंक जोडेर सातौ स्थानमा उक्लिएको छ । थ्री स्टारले एनआरटीलाई गोल अन्तरमा पछि पारेको हो । शीर्षस्थानको मछिन्द्रको १४, मनाङको १३ तथा संकटाको १२ अंक छ ।