काठमाडौं (हाम्रो खेलकुद) – पहिलो हाफमै उत्तम राईले दुई तथा लक्ष्मण रुचालले एक गोल गरेपछि संकटा क्लबले सहिद स्मारक ‘ए’ डिभिजन लिगमा ब्रिगेड ब्वाइज क्लब (बिबिसी) माथि सहज जित निकालेको छ । संकटाले बिबिसीलाई ३–० ले पराजित गरेको हो ।

संकटाको जितमा पहिलो हाफको तीन गोल नै पर्याप्प बन्यो । त्रिपुरेश्वरस्थित दशरथ रंगशालमा आइतबार भएको खेलको १२औं मिनेटमा उत्तम राईले गोल गर्दै संकटालाई १–० को अग्रता दिलाए । जोर्डन जुनियर ओओनाको क्रसमा अनमार्क रहेका शक्तिले हेडमार्फत गोल गर्दा बिबिसीका गोलरक्षक पुर्ण चेम्जोङले रोक्ने कुनै मौका पाएन ।

२८औं मिनेटमा उत्तम राईले व्यक्तिगत र टोलीका लागि दोस्रो गोल गर्दै संकटाको अग्रता दोब्बर पारे । फोडे फोफानाको क्रसलाई रमेश कुमार राजवंशीले क्लियर गर्न नसकेको बललाई शक्तिले नियन्त्रणमा लिदै गोल गर्न सफल भएका थिए ।

३८औं मिनेटमा लक्ष्मण रुचालले गोल गर्दै संकटालाई ३–० ले अघि बढाए । रन्दिप पौडेलले क्लियर गरेको क्लियरेन्स कमजोर बन्दा लक्ष्मणले गोलरक्षक अघि बढेको अवस्थामा खाली पोस्टमा गोल गरेका थिए । दोस्रो हाफमा दुवै टोलीले गोलका केही अवसर सिर्जना गरेपनि गोल निस्कन नसक्दा संकटा विजयी हुन सफल भयो ।

जितसँगै संकटा ६ खेलबाट १२ अंक जोडेर तेस्रो स्थानमा उक्लिएको छ । संकटाले एक खेल कम खेलेको आर्मीलाई ३ अंकले पछि पारेको हो । पराजित बिबिसी ६ खेलबाट ५ अंक जोडेर ११औं स्थानमा झरेको छ । समान ५ अंक नै रहेपनि बिबिसी एपिएफसँग पछि परेको छ ।