काठमाडौं (हाम्रो खेलकुद)– पछिल्ला ३ खेल लगातार गुमाएपछि च्यासल युथ क्लबका प्रशिक्षक बालगोपाल साहुखलले स्वभाविक रुपमा प्रशिक्षण टोलीमाथि प्रश्न खडा भएको बताएका छन् ।

छैटौं चरणको खेलमा शनिबार हिमालयन शेर्पा क्लबलाई ३–१ को नतिजा सुम्पेपछि साहुखलले भने, ‘ हामीले अपेक्षा पूरा गर्न सकेका छैनौं । त्यसलैले कोचिङ स्टाफमाथि प्रश्न उठ्नु स्वभाविक हो ।’

दर्शकदिर्घाबाट नै खेल दौरान प्रश्न उठ्न थालेपछि साहुखलले प्रशिक्षक पदबाट अलग हुन सक्ने संकेत पनि गरेका छन् । ‘मैले पनि सोच्ने बेला भएको छ । टिमबाट म निस्केर राम्रो हुन्छ भने सोच्नुपर्छ’, उनले भने,‘ अब त्यसका लागि बोर्डको भनाई के छ त्यसमा भरपर्छ । हामी संघर्ष गरिरहेका छौं राम्रो प्रदर्शनका लागि । मेरो र टोली दुवैका लागि जटिल अवस्था छ ।’

च्यासलले ६ खेलमा १ जित र १ मा बराबरी खेलेको छ भने बाँकी खेल गुमाएको छ । अघिल्लो खेलको तुलनामा प्रदर्शनका सुधार आएपछि रक्षापक्तिकै कमजोरीका कारण फेरि पनि गोल खानु परेको साहुखलले बताए ।

शेर्पाका प्रशिक्षक युगलकिशोर राईले पनि च्यासलको प्रदर्शनको प्रशंसा गरे । ‘च्यासलले हामी भन्दा राम्रो खेलेको हो । ६०÷४० को खेल थियो, उनले भने, यो लेभलमा रिजल्ट महत्वपूर्ण हुन्छ । हामी रिजल्ट लिन सफल भएका छौं ।’

राईले टोलीमा अझै सुधारको आवश्यकता रहेको दोहोराए । मैले सधै भन्ने गरेको छु । हाम्रो टोलीमा अहिले पनि एडप्टेसनको समस्या छ । नयाँ केहि सिकाउँदा त्यसअघि सिकाएको बिर्से जस्तो भएको छ, उनले थपे,‘ परिपक्कवता आउँन बाँकी छ ।’ लगातार दोस्रो जितसँगै शेर्पा ८ अंकका साथ अंक तालिकाको छैटौं स्थानमा उक्लेको छ । च्यासल १३ औं स्थानमा छ ।