काठमाडौं (हाम्रो खेलकुद) – मनाङ मर्स्याङ्दी क्लबका नाइजेरियन फरवार्ड ओलावाले आफिजले ए डिभिजन लिग अन्तर्गत शनिबार हुने मच्छिन्द्र क्लबविरुद्ध खेल गुमाउने भएका छन् ।

मनाङका लागि जारी लिगमा सबै ५ खेलमा सुरुवात गर्दै पूरा समय बिताएका ओलावालेले प्रतिबन्धका कारण नखेल्ने भएका हुन् । मनाङले गत शनिबार पोखरामा खेलेको नेपाल पुलिस क्लबविरुद्ध खेलमा ओलावालेले पहेंलो कार्ड पाएका थिए । जारी लिगमा उनको दोस्रो कार्ड भएका कारण उनले आजको खेल गुमाउने भएका हुन् । लिगको नियमअनुसार हरेक दोस्रो पहेंलो कार्डपछि खेलाडीले एक खेल प्रतिबन्ध पाउनेछन् ।

ओलावालेले यसअघि संकटाविरुद्ध खेलमा पनि पहेंलो कार्ड पाएका थिए । उनले यस सिजन मनाङका लागि २ गोल गरेका छन् । ओलावालले हिमालयन शेर्पा क्लबविरुद्ध १-० जितमा एकमात्र गोल गरेका थिए । त्यस्तै फ्रेन्ड्सविरुद्ध २-० को जितमा पनि उनले सुरुवाती अग्रता दिलाएका थिए ।

मनाङले उनको अनुपस्थितिमा विमल रानालाई सुरुवाती रोजाइमा उतार्ने सम्भावना छ । यस्तै अन्जन विष्ट र आदेलाजा सोमिडेले सेन्टर फरवार्ड खेलेर निशान लिम्बुले विंगरको रुपमा खेल्ने सम्भावना पनि छ ।

आजको खेल दुवै टोलीलाई अंक तालिकाको शीर्षस्थान सँगै एएफसी कप छनोटको लागि पनि उत्तिकै महत्त्वपूर्ण छ । सातौं चरणको समाप्तिमा शीर्ष स्थानमा रहने टोलीले नेपालको प्रतिनिधित्व गर्दै एएफसी कप छनोट खेल्ने हुनाले पनि यो खेलको महत्त्व बढेको छ ।

हाल मनाङ ५ खेलमा १३ अंकसहित शीर्ष स्थानमा छ । त्यस्तै मच्छिन्द्रको ५ खेलमा ११ अंक छ । आज जित हासिल गर्ने टोलीले एएफसी कप छनोट खेल्न बलियो दाबेदारी प्रस्तुत हुनेछ । अर्को चरणमा मनाङले पोखरामा ब्रिगेड ब्वाइजसँग खेल्दा मच्छिन्द्रले नेपाल पुलिस क्लबको सामना गर्नेछ ।