काठमाडौं (हाम्रो खेलकुद)– एपिएफ फुटबल क्लब र न्यूरोड टिम (एनआरटी) ले कतार एअरवेज सहिद स्मारक ए डिभजन लिगमा शुक्रबार रोमाञ्चक बराबरी खेलका छन् । दशरथ रंगशालामा भएको छैटौं चरणको पहिलो खेलमा एपिएफ र एनआरटीले ३–३ को बराबरी खेलेका हुन् ।

एपिएफका लागि आशिष लामा, दिपेश धिमाल र नवीन लामाले समान १ गोल गरे । एनआरटीका लागि दर्शन गुरुङले २ र अर्को गोल मेसुके ओलुमोईले गरे ।
खेलको ३२ औं मिनेटमा दर्शनको गोलबाट दर्शकको गोलबाट एनआरटीले अग्रता लिएको थियो । मेसुकेको क्रसमा अनमार्क रहेका दर्शन ले फ्रि हेडरमार्फत गोल गरेका थिए । त्यसको ५ मिनेटपछि नै आशिषले एपीएफलाई बराबरी गोल गरेका थिए । ३७ औं मिनेटको त्यो गोलमा आशिषले प्रदिप लामाको पासलाई सदुपयोग गरेका हुन् ।

खेलको ४८ औं मिनेटमा दर्शनले गोल गर्दै एनआरटीलाई पुनः अग्रता दिलाए । दर्शनले रञ्जन विष्टको पासमा बललाई पोष्टको दिशा दिदा एपिएफका गोलकिपरले बचाउने कुनै मौका पाएनन् । खेलको ६१ औं मिनेटमा मेसुकेले गोल गर्दै एनआरटीको ३–१ अग्रता फराकिलो पारे । मेसुकेको प्रहारलाई किपरले क्लियर गर्न नसक्दा एनआरटीले अग्रता फराकिलो पारेको हो ।

खेलको ६५ औं मिनेटमा कप्तान नविन लामाको फ्रिकिक प्रहार दिपेशले सहजै गोलमा परिणत गरेपछि एपिएफले खेलमा फर्कने प्रयास गरेको थियो । आशिषलाई एनआरटीका विक्रम धिमालले फाउल गरेपछि पाएको फ्रिकिकमा एपिएफले गोल गरेको थियो । खेलको ६९ औं मिनेटमा नविनले गोल गरेपछि खेलमा ३–३ को बराबरी भएको थियो । आशिषको क्रममा नविनले गोल गरेका थिए । बराबरीपछि एनआरटी ७ अंकसहित छैटौं स्थान र ५ अंकसिहत एपिएफ ११ औं स्थानमा उक्लेको छ ।