एजेन्सी – ट्राइब्रेकरमा गोलरक्षक काओइहिम केलहर नायाक बनेपछि लिभरपुलले प्रिमियर लिग क्लब लेस्टर सिटीमाथि रोमाञ्चक जित निकाल्दै इंग्लिस फुटबल लिग (इएफएल) कप अर्थात कारवाओ कपको सेमिफाइनलमा प्रवेश गरेको छ ।

घरेलु मैदानमा लिभरपुलले खेलमा दुईपटक पछि परेको स्थिति उल्ट्याउँदै ट्राइब्रेकरमा ५–४ को रोमाञ्चक जित निकाल्दै अन्तिम चारमा स्थान पक्का गरेको हो । निर्धारित समयको खेल ३–३ गोलको बराबरीमा सकिएपछि खेलको निर्णय ट्राइब्रेकरबाट लिइएको हो । जसमा लिभरपुलले बाजी मार्न सफल भयो ।

ट्राइब्रेकरमा लिभरपुलका जेम्स मिल्नर, रोबर्टाे फिर्मिनो, एलेक्स अक्सलेड चेम्वरलेन, नावी केइटा र डिएगो जोटाले गोल गरे । ताकुमी मिनामिनोको पेनाल्टी क्रसबारमा लाग्दै बाहिरिएको थियो । लेस्टरका युरी टिलेमान्स, जेम्स म्याडिसन, मार्क अल्ब्राइटन र केलिची इहानेचोले गोल गर्दा लुकी थोमस र रायन बट्रान्डको प्रहारलाई लिभरपुलका गोलरक्षक काओइहिम केलहरले बचाए ।

त्यसअघि एनफिल्डमा बुधबार राति भएको खेलको नवौं मिनेटमा जेमी भार्डीको गोलबाट लेस्टरले अग्रता लिएको थियो । उनले जेम्स म्याडिसनको पासमा गोल गरेका थिए । १३औं मिनेटमा भार्डीले पाटसन डाँकाको पासमा व्यक्तिगत दोस्रो गोल गर्दै लेस्टरको अग्रता दोब्बर पारे ।

१९औं मिनेटमा एलेक्स अक्सलेड चेम्वरलेनले गोल गर्दै खेललाई २–१ को अवस्थामा ल्याए । उनले रोबर्टाे फिर्मिनोको पासलाई सदुपयोग गरेका थिए । ३३औं मिनेटमा जेम्स म्याडिसनले गोल गर्दै लेस्टरलाई ३–१ ले अघि बढाए । ६८औं मिनेटमा डिएगो जोटाले ताकुमी मिनामिनोको पासमा गोल गर्दै खेललाई ३–२ को स्थितिमा ल्याए । इन्ज्युरी समयको थप गरिएको पाँचौ मिनेटमा ताकुमी मिनामिनोले जेम्स मिल्नरको पासमा गोल गर्दै खेललाई ट्राइब्रेकरमा लम्ब्याए ।

यो सँगै कारवाओ कपको सेमिफाइनल समिकरण पुरा भएको छ । यसअघि आर्सनल, चेल्सी र टोटेनहमले अन्तिम चारको यात्रा तय गरिसकेको छ । अब सेमिफाइनलमा आर्सनल र लिभरपुल तथा चेल्सी र टोटेनहमबीच प्रतिस्पर्धा हुनेछ । दुवै सेमिफाइनल ५ जनवरीमा हुनेछ । फाइनल १२ जनवरीमा हुनेछ ।