काठमाडौं (हाम्रो खेलकुद) – फरवार्ड आशिष लामाको दुई गोल मद्दतमा विभागीय नेपाल एपिएफ फुटबल क्लबले कतार एअरवेज सहिद स्मारक ‘ए’ डिभिजन लिगमा पहिलो जित निकालेको छ ।

एपिएफले लिगको पाँचौ खेलमा फ्रेन्ड्सलाई ३–१ ले पराजित गर्दै लिगमा पहिलो जित दर्ता गरेको हो । एपिएफको जितमा विकी तामाङले गोल गर्दा फ्रेन्ड्सका प्रिजेन तामाङले एक गोल फर्काए ।

त्रिपुरेश्वरस्थित दशरथ रंगशालामा सोमबार भएको खेलको पाँचौ मिनेटमा प्रिजेन तामाङको पासमा जमल एन्थोनी फ्रान्कोइसको वान भर्सेस वानको प्रहारलाई एपिएफका जापनिज गोलरक्षक युया कुरियामाले अघि बढ्दै बचाउँदा फ्रेन्ड्स अग्रता लिनबाट चुक्यो । १७औं मिनेटमा प्रिजेन तामाङको पेनाल्टी बक्सभित्रको प्रहारलाई गोलरक्षक युयाले डाइभ दिदै बचाउँदा फ्रेन्ड्स अग्रता लिनबाट चुक्यो ।

सुरुवातमा दवाव झेलेपनि ३०औं मिनेटमा विकी तामाङले गोल गर्दै एपिएफलाई १–० को अग्रता दिलाए । नविन लामाको पासमा आशिष लामाले गरेको प्रहार फ्रेन्ड्सका कप्तान असिम भुषाललाई डिफ्लेक्ट हुँदा नविनले मिलाइदिएको पासमा विकीको शक्तिशाली प्रहार क्रसबारमा लाग्दै गोलमा परिणत भएको थियो ।

त्यसको दुई मिनेटपछि ३२औं मिनेटमा आशिष लामाले गोल गर्दै एपिएफको अग्रता दोब्बर पारे । आशिषको प्रहार असिमलाई नै डिफ्लेक्ट हुदै गोलमा परिणत हुँदा गोलरक्षक राहुल रामचन्द्र यादवले रोक्ने कुनै अवसर नै पाएनन् ।

५६औं मिनेटमा आशिष लामाले व्यक्तिगत दोस्रो तथा टोलीका लागि तेस्रो गोल गर्दै एपिएफको अग्रता दोब्बर पारे । आभास लामिछानेको पासमा अनमार्क रहेका आशिषले एक्लै बल अघि बढाउँदै गोलरक्षक राहुललाई बिट गर्दै सहज फिनिस गरे ।

६८औं मिनेटमा प्रिजेन तामाङले पेनाल्टीमा गोल गर्दै खेललाई ३–१ को अवस्थामा ल्याए । पेनाल्टी बक्समा एन्थोलीलाई दिपेश धिमालले फउल गरेपछि प्राप्त पेनाल्टीमा प्रिजेनले सहजै गोल गरे ।

७१औं मिनेटमा आशिष ह्याट्रिकबाट चुके । वान भर्सेस वानको अवस्थामा उनको प्रहारलाई गोलरक्षक राहुलले अघि बढ्दै ब्लक गरे । ९०औं मिनेटमा नविन लामाको फ्रिकिकलाई सनिष श्रेष्ठले भेट्न सकेन । त्यसपछि थप गोल निस्कन नसक्दा एपिएफ विजयी हुन सफल भयो ।

जितपछि पुछारमा रहेका एपिएफले तीन स्थान सुधार गर्दै ११औं स्थानमा उक्लिएको छ । समान ४ अंक नै रहेपनि गोल अन्तरमा जावलाखेल युथ क्लब र च्यासल युथ क्लबलाई पछि पारेको छ । पराजित फ्रेन्ड्स २ अंक जोडेर पुछारमा झरेको छ ।

एपिएफले थ्री स्टारलाई बराबरीमा रोक्दै लिगमा पहिलो अंक जोडेको थियो । एपिएफले बिबिसी, च्यासल र सातदोबाटोसँग हार भोगेको थियो । फ्रेन्ड्सले सातदोबाटो युथ क्लब र थ्री स्टारसँग बराबरी खेल्दा संकटा र मनाङसँग हार बेहोरेको थियो ।