काठमाडौं (हाम्रो खेलकुद) – दुई मिनेटको अन्तरमा दुई गोल गर्दै विभागीय नेपाल एपिएफ फुटबल क्लबले कतार एअरवेज सहिद स्मारक ‘ए’ डिभिजन लिगमा फ्रेन्ड्सविरुद्ध पहिलो हाफमा २–० को अग्रता लिएको छ ।

विकी तामाङ र आशिष लामाले गोल गर्दै एपिएफलाई अग्रता दिलाएका हुन् । त्रिपुरेश्वरस्थित दशरथ रंगशालामा सोमबार भएको खेलको पाँचौ मिनेटमा प्रिजेन तामाङको पासमा जमल एन्थोनी फ्रान्कोइसको वान भर्सेस वानको प्रहारलाई एपिएफका जापनिज गोलरक्षक युया कुरियामाले अघि बढ्दै बचाउँदा फ्रेन्ड्स अग्रता लिनबाट चुक्यो ।

१७औं मिनेटमा प्रिजेन तामाङको पेनाल्टी बक्सभित्रको प्रहारलाई गोलरक्षक युयाले डाइभ दिदै बचाउँदा फ्रेन्ड्स अग्रता लिनबाट चुक्यो ।सुरुवातमा दवाव झेलेपनि ३०औं मिनेटमा विकी तामाङले गोल गर्दै एपिएफलाई १–० को अग्रता दिलाए । नविन लामाको पासमा आशिष लामाले गरेको प्रहार फ्रेन्ड्सका कप्तान असिम भुषाललाई डिफ्लेक्ट हुँदा नविनले मिलाइदिएको पासमा विकीको शक्तिशाली प्रहार क्रसबारमा लाग्दै गोलमा परिणत भएको थियो ।

त्यसको दुई मिनेटपछि ३२औं मिनेटमा आशिष लामाले गोल गर्दै एपिएफको अग्रता दोब्बर पारे । आशिषको प्रहार असिमलाई नै डिफ्लेक्ट हुदै गोलमा परिणत हुँदा गोलरक्षक राहुल रामचन्द्र यादवले रोक्ने कुनै अवसर नै पाएनन् ।

दुवै टोली रेलिगेसन जोनमा रहेकाले यो खेल दुवै टोलीको लागि महत्वपुर्ण रहेको छ । लिगको चौथो चरणको खेलसम्म फ्रेन्ड्सको दुई तथा एपिएफको एक अंक छ । एपिएफले थ्री स्टारलाई बराबरीमा रोक्दै लिगमा पहिलो अंक जोडेको थियो । फ्रेन्ड्सले सातदोबाटो युथ क्लब र थ्री स्टारसँग बराबरी खेल्दै अंक जोडेको थियो ।