एजेन्सी – टोटेनहम हटस्पर र लिभरपुलले इंग्लिस प्रिमियर लिगमा रोमाञ्चक बराबरी खेलेका छन् । टोटेनहम र लिभरपुलले २–२ गोलको बराबरी खेल्दै अंक बाँडेका हुन् ।

टोटेनहम हटस्पर स्टेडियममा आइतबार राति भएको खेलमा घरेलु टोलीका लागि ह्यारी केन र ह्युङ मिन सनले गोल गरे । लिभरपुलका डिएगो जोटा र एन्ड्रिउ रोबर्टसनले गोल गरे ।

खेलको १३औं मिनेटमा ह्यारी केनको गोलबाट घरेलु टोली टोटेनहमले सुरुवाती अग्रता लिएको थियो । उनले टांगी एनडोम्वेलेको पासलाई सदुपयोग गरेका थिए । ३५औं मिनेटमा डिएगो जोटाले गोल गर्दै खेललाई १–१ गोलको बराबरीमा ल्याए । जोटाले एन्ड्रिउ रोबर्टसनको पासमा गोल गरेका थिए ।

६९औं मिनेटमा एन्ड्रिउ रोबर्टसनले गोल गर्दै लिभरपुललाई खेलमा २–१ को अग्रता दिलाए । उनले ट्रेन्ट एलेक्सान्डर आर्नाेल्डको पासमा गोल गरेका थिए । ७४औं मिनेटमा ह्युङ मिन सनले गोल गर्दै खेललाई २–२ गोलको बराबरीमा ल्याए ।

७७औं मिनेटमा लिभरपुल १० खेलाडीमा समेटिन पुग्यो । इमर्सन रोयललाई अनावश्यक फउल गरेपछि रेफ्रीले भिएआरको सहायता लिदै रोबर्टसनलाई रातो कार्ड देखाँउदै मैदान बाहिर पठाएका थिए । त्यसपछि थप गोल निस्कन नसक्दा खेल बराबरीमा टुंगियो ।

बराबरीसँगै दोस्रो स्थानमा यथावत रहेको लिभरपुलको १८ खेलबाट ४१ अंक पुगेको छ । लिभरपुल शीर्षस्थानको म्यानचेस्टर सिटीसँग ३ अंकले पछि परेको छ । टोटेनहम १५ खेलबाट २६ अंक जोडेर सातौ स्थानमा रहेको छ ।