काठमाडौं (हाम्रो खेलकुद) – हिमालयन शेर्पा क्लबले कतार एअरवेज सहिद स्मारक ‘ए’ डिभिजन लिगमा पहिलो जित दर्ता गरेको छ । आइतबार भएको ब्रिगेड ब्वाइज क्लब (बिबिसी) लाई ३–१ ले पराजित गर्दै शेर्पाले लिगमा पहिलो जित निकालेको हो ।

त्रिपुरेश्वरस्थित दशरथ रंगशालामा शेर्पाको जितमा मुताम्वा पिस्टोन भुनयोली, सुरेश कुमाल र मनिष थापाले गोल गरे । बिबिसीका भुवन बस्नेतले एक गोल गरे ।

खेलको चौथो मिनेटमा मुताम्वा पिस्टोन भुनयोलीको गोलबाट शेर्पाले १–० को अग्रता लिएको थियो । शिशिर लेखाीले विसन गुरुङलाई फउल गरेपछि प्राप्त फ्रिकिकमा कप्तान विश्वास श्रेष्ठको प्रहारलाई मुताम्वाले हेडरमार्फत जाली चुमाउँदा गोलरक्षक एन्जल श्रेष्ठ मुकदर्शक बने ।

१२औं मिनेटमा सुरेश कुमालको क्रसमा मुताम्वाको हेडरलाई गोलरक्षक एन्जल श्रेष्ठले टप कर्नरबाट पञ्च गर्दै बाहिर फाले । १९औं मिनेटमा दिपेश गुरुङको फ्रिकिकमा ड्याडी जुनियर वाम्वाको हेडर पहिलो बारबाट बाहिरिदा बिबिसी बराबरीबाट चुक्यो ।

५३औं मिनेटमा सब्सिच्युट फरवार्ड भुवन बस्नेतले गोल गर्दै खेललाई १–१ गोलको बराबरीमा ल्याए । दोस्रो हाफको शुरुमै दिनेश राईको स्थानमा मैदान छिरेका भुवनले शिशिर लेखीको पासमा पहिलो बार च्याप्दै गरेको सशक्त प्रहारले जाली चुमेको थियो ।

७४औं मिनेटमा सुरेश कुमालले गोल गर्दै शेर्पालाई २–१ को अग्रता दिलाए । जीवन गुरुङको लामो पासमा गोलरक्षक एन्जल श्रेष्ठ अघि बढेको अवस्थामा वान टचमा चिपमा गोल गर्न सफल भएका थिए । इन्ज्युरी समयको थप गरिएको चौथो मिनेटमा मनिष थापाले गोल गर्दै शेर्पाको जित पक्का गरे ।

जितपछि शेर्पा ५ खेलबाट ५ अंक जोडेर आठौं स्थानमा उक्लिएको छ । पराजित बिबिसीको पनि ५ खेलबाट ५ अंक नै छ । गोल अन्तरमा बिबिसी नवौं र पुलिस १०औं स्थानमा रहेको छ ।

पहिलो जित निकालेको शेर्पाले लिगमा चार खेल खेल्दा समान दुई बराबरी र हारको नतिजा निकालेको थियो । दोस्रो हार बेहोरेको बिबिसीले १ जित, दुई बराबरीको नतिजा निकालेको छ ।