काठमाडौं (हाम्रो खेलकुद)– हिमालयन शेर्पा क्लबले दबाबका बीच कतार एअरवेज सहिद स्मारक ए डिभिजन लिगमा आइतबार ब्रिगेड ब्वाइज क्लब (बिबिसी) को सामना गर्दैछ । लिगमा आज हुने एक मात्र खेल दिउँसो ४:४५ बजे सुरु हुनेछ ।

शनिबार सम्म लिगका ३३ खेल सकिँदासम्म एक खेल पनि नजित्ने ३ टोली मध्ये हिमालयन शेर्पा एक हो । फ्रेन्ड्स क्लब र एपिएफ फुटबल क्लबले पनि अहिले सम्म एक खेल जित्न सकेका छैनन् । त्यसैले १४ टोलीको सहभागिता रहेको लिगमा फ्रेन्ड्स १२ औं, हिमालय शेर्पा १३ औं र एपिएफ अंकतालिकाको पुछारमा छ ।

एक खेल पनि नजित्दा यी तीन टोलीमाथि रेलिगेसन दबाब बढ्दै गएको छ । यस्तै दबाबमा रहेको जावलाखेल युथ क्लबले लिगमा पहिलो जित दर्ता गर्ने क्रममा शनिबार च्यासल युथ क्लबलाई १–० ले हराएको थियो । यसपटक लिगमा दुई टोली रेलिगेसनमा पर्नेछन् ।

रेलिगसेन दबाब कम गराउनका लागि पनि हिमालयन शेर्पाका लागि बिबिसीसँगको खेल महत्वपूर्ण हुनेछ । बिबिसी ४ खेलमा १ जित र २ बराबरी र १ हारका साथ ५ अंक जोडेर आठौं स्थानमा छ । फ्रेन्ड्स, हिमालयन शेर्पाको समान २ अंक छ भने एपिएफको १ अंक छ ।

पहिलो खेलमा संकटासँग १–१ को बराबरी खेलेको हिमालयन शेर्पा अर्को खेलमा मनाङसँग १–० ले पराजित भएको थियो । तेस्रोमा पुलिससँग १–१ को बराबरी खेलेको हिमालयन शेर्पा यसअघिको खेलमा साविक विजेता मच्छिन्द्रसँग ३–० ले पराजित भएको थियो ।

पहिलो खेलमै एपिएफलाई ३–२ ले हराउँदै दमदार सुरुवात गरेको बिबिसीले दोस्रो खेलमा एनआरटीसँग गोलरहित बराबरी खेलेको थियो । आर्मीसँग १–० को हार बेहोरेको बिबिसीले यसअघिको खेलमा छिमेकी जावलाखेलसँग गोलरहित बराबरी खेलेको थियो ।