पोखरा (हाम्रो खेलकुद) – एएफसी कप छनोटमा नेपालको तर्फबाट प्रतिनिधित्व गर्ने एक स्थानमा मनाङ मर्स्याङ्दी क्लबको दाबेदारी बलियो देखिएको छ ।

शनिबार पोखरा रंगशालामा नेपाल पुलिस क्लबलाई ३-१ ले पराजित गर्दै मनाङले अंक तालिकाको शीर्षस्थानमा २ अंकको अग्रता कायम गर्यो । सातौं चरणको खेल सकिँदा शीर्षस्थानमा रहने टोली एएफसी कप छनोट खेल्ने प्रावधान रहेको छ । अब दुई चरणको खेलको नतिजाले एएफसी कप छनोट खेल्ने टोली पक्का हुनेछ ।

अघिल्लो दिन दशरथ रंगशालामा साविक विजेता मच्छिन्द्र फुटबल क्लब र त्रिभुवन आर्मी फुटबल क्लबले अलग अलग खेलमा बराबरी खेलेपछि मनाङले त्यसको फाइदा उठाउँदै शीर्षस्थानमा उक्लेको हो । सातौं चरणको समाप्तीमा ४ क्लब मनाङ, मच्छिन्द्र, आर्मी र एपिएफ फुटबल क्लबमध्ये अंकतालिकाको माथि रहने टोलीले एएफसी कप छनोटमा नेपालको प्रतिनिधित्व गर्नेछ ।

छैटौं चरणमा मच्छिन्द्रसँग खेल्नुअघि मनाङ (१३ अंक) ले दुई अंकको स्पष्ट अग्रता लिएको छ । दोस्रो स्थानको मच्छिन्द्रको ११ र तेस्रो स्थानको आर्मीको ९ अंक छ । मनाङले सातौं र आठौं चरणका खेल पनि पोखरा रंगशालामा नै खेल्नेछ । छैटौं चरणको खेलका लागि भने टोली काठमाडौं फर्कनेछ ।

छैटौं चरणमा मनाङ र मच्छिन्द्रले एक अर्कासँग खेल्दैछन् । यस्तोमा एएफसी कप छनोट खेल्ने सम्भावना बोकेको अर्को क्लब त्रिभुवन आर्मीले थ्री स्टार क्लबको सामना गर्नेछ । मनाङले सातौं चरणमा पोखरामा ब्रिगेड ब्वाइज क्लबसँग खेल्दा मच्छिन्द्रले पुलिसको सामना गर्दैछ । आर्मीले भने सातौं चरणमा एपिएफको सामना गर्नेछ ।