काठमाडौं (हाम्रो खेलकुद)– कतार एअरवेज सहिद स्मारक ए डिभिजन लिगमा पहिलो जितपछि स्वभाविक रुपमा खुसी लागेको जावलाखेल युथ क्लबका प्रशिक्षक किशोर केसीले बताएका छन् । लिगको आफ्नो पाँचौं खेलमा शनिबार च्यासल युथ क्लबलाई १–० ले हराउँदै जावलाखेलले पहिलो जित दर्ता गराएको छ ।

‘पहिलो जित हो । खुसी हुनु स्वभाविक हो । यो जितले टिमको हौसला बढेको छ । जितले खेलाडीमा परिवर्तन आउन सक्छ । यसअघि गोल निस्केको थिएन । गोल नहुँदा दबाब थपिन्छ’, केसीले भने,‘ गोल निस्केको छ । यसले दबाब केहि पक्कै कम भएको छ । गोल हान्न सक्छ भन्ने प्रमाणित भएको छ ।’

अघिल्लो खेलमा बराबरी खेलेको जावलाखेलको ५ खेलमा ४ अंक पुगेको छ । केसीले अहिले नै कुन टोली रेलिगेसनमा पर्छ अहिले नै अनुमान गर्न कठिन हुने बताए । ‘६-७ खेल नसकेसम्म यहि टिम झर्छ भन्न सकिन्न’, आफ्नो टोलीको लक्ष्यका बारेमा उनले थपे,‘ हामी रेलिगेसनमा पर्ने टोली त होइनौं । चौथो सम्म हुने भन्ने लक्ष्यका साथ आएका हौं । विश्वास छ राम्रो खेल्दै दर्शकलाई खुसी पार्दै अघि बढ्नेछौं ।’

च्यासलका प्रशिक्षक बालगोपाल साहुखलले दुवै टोलीका लागि महत्वपूर्ण खेल भएपनि आफ्नो टोलीको प्रदर्शन सन्तोषजनक हुन नसकेको बताए । उनले भने ‘पहिलो हाफमै गल्तिले गोल खायौं, खेलाडीको कमिटमेन्टमा पनि कमी भइरहेको । यो भन्दा राम्रो गर्न सक्थ्यौं। महत्त्वपूर्ण खेल थियो हाम्रो लागि र जावलाखेलका लागि पनि । पहिलो हाफमा गल्तिमा गोल खायो ।’

युवा खेलाडीले सोचे अनुरुपको प्रदर्शन गर्न नसकेको साहुखलले दोहोर्याए । ‘खेलाडीलाई नयाँ चिज लिन गाह्रो भएको पनि होला । यानिक चोटग्रस्त हुँदाहुँदै खेलायौं’, उनले थपे,‘ अनुभवी खेलाडी कर्ण लिम्बुलाई खेलाउँदा केहि सुधार त देखियो । तर युवा खेलाडीले धेरै गर्न बाँकी छ ।’

३७औं मिनेटमा भारतीय निकोलस फर्नान्डेसले गोल गर्दै जावलाखेललाई १–० को अग्रता दिलाएका हुन् । डिफेन्डर यान्निक केचाबाट बल खोस्दै ओनगना एन जुनियरले पेनाल्टी बक्सभित्र उपलब्ध गराएको बललाई अनमार्क रहेका निकोलसले सहजै फिनिस गरेका थिए । त्यहि गोल खेलको निर्णय बन्यो र जावलाखेलले पहिलो जित हालि गर्यो ।