काठमाडौं (हाम्रो खेलकुद) – जावलाखेल युथ क्लबले कतार एअरवेज सहिद स्मारक ‘ए’ डिभिजन लिगमा पहिलो जित निकाल्दा च्यासल युथ क्लबलाई पराजित गरेको छ ।

पहिलो हाफमा निकोसल फर्नान्डेसले गरेको गोल नै जावलाखेलको जितमा निर्णायक बन्यो । जारी लिगमा जावलाखेलको यो पहिलो गोल समेत हो । यसअघिका चार खेल खेलमा जावलाखेलले गोल गर्न सकेको थिएन । टोलीले लिगको चौथो चरणसम्म चार गोल बेहोर्दा कुनै गोल गर्न सकेको थिएन ।

जावलाखेलले पहिलो र दोस्रो खेलमा मनाङ र पुलिससँग समान १–० ले पराजित हुदा तेस्रो खेलमा मछिन्द्रसँग २–० ले पराजित हुदा चौथो खेलमा बिबिसीसँग गोलरहित बराबरी खेलेको थियो ।

त्रिपुरेश्वरस्थित दरशथ रंगशालामा शनिबार भएको खेलको ३२औं मिनेटमा ओनगना एन जुनियरको एकल प्रयासलाई च्यासलका गोलरक्षक अर्पण कार्कीले अघि बढ्दै बचाउँदा जावलाखेल अग्रता लिनबाट चुक्यो । उनले पेनाल्टी बक्समा सुवर्ण अवसर पाएपनि प्रहार गर्न ढिला गरेका थिए ।

३७औं मिनेटमा भारतीय निकोलस फर्नान्डेसले गोल गर्दै जावलाखेललाई १–० को अग्रता दिलाएका हुन् । डिफेन्डर यान्निक केट्चाबाट बल खोस्दै ओनगना एन जुनियरले पेनाल्टी बक्सभित्र उपलब्ध गराएको बललाई अनमार्क रहेका निकोलसले सहजै फिनिस गरेका थिए ।

४४औं मिनेटमा यान्निक केट्चाको फ्रिकिकमा सब्सिच्युट फरवार्ड विकास मेराग्लियाको हेडरलाई गोलरक्षक टिकेन्द्र सिहं थापाले पञ्च गर्दै बचाए । ६६औं मिनेटमा राजीव लोप्चनको पासमा कर्ण लिम्बुको पेनाल्टी बक्सभित्रको प्रहार दोस्रो बार च्याप्दै बाहिरिदा च्यासल बराबरीबाट चुक्यो ।

७४औं कर्ण लिम्बुको प्रहार गोलरक्षक टिकेन्द्र सिंह थापाले मुस्किलले नियन्त्रणमा लिदा च्यासल बराबरीबाट चुक्यो । ७७औं मिनेटमा ओनगुना एन जुनियरले आँफै प्रहार गर्नुपर्ने बललाई पास दिदा रुपबहादुर लामाले छाडेको बलमा सुरज ज्यु ठकुरीको प्रहार क्रसबारमा लाग्दै बाहिरिदा जावलाखेल अग्रता दोब्बर पार्नबाट चुक्यो ।

जितसँगै जावलाखेलले ५ खेलबाट ४ अंक जोडेर १०औं स्थानमा उक्लदै रेलिगेसन जोन छाडेको छ । जावलाखेलले च्यासल, फ्रेन्ड्स र हिमालयन शेर्पालाई पछि पारेको हो । हारसँगै च्यासल ५ खेलबाट ४ अंक जोडेर ११औं स्थानमा झरेको छ ।