काठमाडौं (हाम्रो खेलकुद)– सुन्दा अचम्म लाग्न सक्छ, अखिल नेपाल फुटबल संघ (एन्फा)ले कुनै अन्तर्राष्ट्रिय मैत्रीपूर्ण खेलका लागि पहल गरेन भने एएफसी सोलिडारिटी कप विजेता नेपाली राष्ट्रिय टोलीका लागि आउने एक वर्ष कुनै खेल वा प्रतियोगिता छैन ।

बीचमा मैत्रीपूर्ण नभएकामा राष्ट्रिय टोलीले अब खेल्ने भनेको २०१७ को डिसेम्बरमा मा बंगलादेशमा आयोजना हुने साफ च्याम्पिएनसिपसम्म कुर्नुपर्ने हुन्छ । त्यसबाहेक, बंगालदेश फुटबल संघले आयोजना गर्ने भनिएको बंगबन्धु गोल्डकपको २०१७ को संस्करणमा नेपालको सहभागिता जनाउन सम्भावना छ । तर नेपाल साविक विजेता रहेको त्यो प्रतियोगिता हुने नहुने अझै टुंगो लागेको छैन । नेपाली टोलीले सोलिडारिटी अघि जापानी प्रशिक्षक ग्याटुको कोजीको नियुक्ति पछि जम्मा दुइ मैत्रीपूर्ण खेल खेलेको थियो ।

एन्फाले राष्ट्रिय टोलीलाई हरेक महिनामा एक खेल खेलाउने भनिएपनि त्यसमा एन्फा असफल भएको थियो । तर, अबको समयमा राष्ट्रिय टोलीलाई मैत्रीपूर्ण खेलहरुमा सहभागी गराउन नसकेमा टोलीको साफ जित्ने सपना, सपनामै सिमित हुन सक्छ । दक्षिण एसियालीको सबैभन्दा प्रतिष्ठित साफ च्याम्पियनसिप नेपालले अहिले सम्म जित्न सकेको छैन । सेमिफाइनल सम्म पुग्नुनै साफ च्याम्पियनसिपमा नेपालको अहिले सम्म उच्च प्रदर्शन हो ।

साफको तयारीको लागि अहिले देखि योजना तयार गर्ने र सोहि अनुसार अघि बढ्न सके साफ च्याम्पियनसिपमा उपाधिको आशा गर्न सकिन्छ ।