काठमाडौं (हाम्रो खेलकुद) – शीर्षस्थानमा रहेको मछिन्द्र फुटबल क्लबले कतार एअरवेज सहिद स्मारक ‘ए’ डिभिजन लिगमा संकटा क्लबसँग बराबरी खेलेको छ । मछिन्द्रले संकटासँग गोलरहित बराबरी खेल्दै अंक बाँडेको हो ।

त्रिपुरेश्वरस्थित दशरथ रंगशालामा शुक्रबार भएको प्रतिस्पर्धात्मक खेलमा दुवै टोलीले पाएको अवसर गुमाउँदा अंक बाड्न बाध्य बनेको हो । खेलको पहिलो मिनेटमा फोडे फोफाना चुक्दा संकटाले अग्रता लिने सुवर्ण मौका गुमायो । जय गुरुङको पासमा फोडे फोफानाको वान भर्सेस वानको प्रहारलाई गोलरक्षक विशाल श्रेष्ठले अघि बढ्दै बचाएका थिए ।

२१औं मिनेटमा सुनिल बलका कर्नरलाई गोलरक्षक राजा बाबु थापाले पञ्च गर्दै बचाए । त्यसमै विशाल राईको प्रहारले पोस्टको दिशा लिन सकेन । ३०औं मिनेटमा रन्जित धिमालको क्रस सिधै गोलरक्षक राजा बाबु थापाको हातमा पुग्यो । ३६औं मिनेटमा फोडे फोफानाको प्रहार पहिलो बार च्याप्दै बाहिरियो ।

४०औं मिनेटमा फोडे फोफानाले मैदानको मध्य भागबाट दुई डिफेन्डरलाई बिट गर्दै दिएको क्रसलाई आन्द्रस नियाले क्लियर गर्दै मछिन्द्रको संकट टारे । दोस्रो हाफमा सुधारिएको खेल पस्कदै संकटामाथि दवाव बढाएको मछिन्द्रले ६१औं मिनेटमा गोल गरेपनि गोलले मान्यता पाएन ।

सुनिल बलको पासमा मनिष डाँगीले गोल गरेपनि गोल गर्नुअघि उनी अफसाइड पोजिसनमा रहँदा उनको गोलले मान्यता पाएन । त्यसपछि दुवै टोलीबाट गोल निस्कन नसक्दा खेल बराबरीमा सकियो ।

जरी लिगमा अपराजित रहेको मछिन्द्रको यो दोस्रो बराबरी हो । यसअघि मछिन्द्रले आर्मीसँग गोलरहित बराबरी खेलेको थियो । अपराजित नै रहेको संकटाको भने यो तेस्रो बराबरी हो । संकटाले हिमालयन शेर्पा र मनाङसँग बराबरी खेलेको थियो । यो बराबरसँगै मछिन्द्रले शीर्षस्थानमा स्पष्ट ३ अंकको अग्रता लिने मौका गुमाएको छ ।

मछिन्द्रले एक खेल कम खेलेको मनाङलाई १ अंकले पछि पारेको छ । शनिबार दोस्रो स्थानमा रहेको मनाङले पुलिसलाई हराउन सके मछिन्द्रले शीर्षस्थान गुमाउनेछ । बराबरीसँगै संकटाले पनि कम्तीमा एक दिन शीर्षस्थानमा पुग्ने अवसर गुमाउँदा चौथो स्थानमा यथावत रहेको छ । समान ९ अंक नै रहेपनि आर्मी गोलअन्तरमा तेस्रो स्थानमा छ ।