काठमाडौं (हाम्रो खेलकुद) – विभागीय त्रिभुवन आर्मी फुटबल क्लब कतार एअरवेज सहिद स्मारक ‘ए’ डिभिजन लिगमा सातदोबाटो युथ क्लबसँग बराबरीमा रोकिएको छ ।

आर्मीले सुरुवाती अग्रता जोगाउन नसक्दा सातदोबाटोसँग १–१ गोलको बराबरी खेलेको हो । त्रिपुरेश्वरस्थित दशरथ रंगशालामा शुक्रबार भएको खेलमा खेलमा दिनेश हेन्जनको गोलबाट आर्मीले १०औं मिनेटमा अग्रता लिएको थियो ।

टेक बहादुर बुढाथोकीको क्रसमा कप्तान जर्जप्रिन्स कार्कीले फ्लिक गरेको बलमा पिटर सेगुन पनि बिट हुदा अनमार्क रहेका दिनेशले सहजै जाली चुमाएका थिए । त्यसअघि १०औं मिनेटमा निरज चौधरीको प्रहार सिधै गोलरक्षक बिकेश कुथुको हातमा पुगेको थियो ।

१६औं मिनेटमा अजायी मार्टिन्सले गोल गर्दै खेललाई १–१ गोलको बराबरीमा ल्याए । गोलरक्षक अभिषेक बरालको लामो पासलाई मार्टिन्सले पेनाल्टी बक्समा नियन्त्रणमा लिदै डिफेन्डर बिमल पाण्डेयलाई बिट गर्दै गरेको प्रहार गोलमा परिणत भएको थियो ।

२१औं मिनेटमा टेक बहादुर बुढाथोकीको क्रसलाई गोलरक्षक अभिषेक बरालले पञ्च गर्दै बचाउँदा पिटर सेगुनको क्लियरेन्स कमजोर बन्दा सन्तोष तामाङको ओभरहेड किकलाई गोलरक्षक अभिषेकले नियन्त्रणमा लिए ।

६६औं मिनेटमा कप्तान मानबहादुर तामाङको पासमा आदित्य शाक्यको फ्रि हेडर गोलरक्षक बिकेश कुथुले सहजै बचाए । ६९औं मिनेटमा पेनाल्टी बक्सबाहिरको प्रहार पोस्ट नजिकैबाट थोरै आकासिदा आर्मी अग्रता लिनबाट चुक्यो । ७५औं मिनेटमा गौतम श्रेष्ठको क्रसमा सन्तोष तामाङको प्रहार दोस्रो बार च्याप्दै बाहिरियो ।

यो बराबरीपछि अपराजित रहेको आर्मीको ५ खेलबाट ९ अक पुगेको छ । आर्मी तेस्रो स्थानमा यथावत रहेको छ । सातदोबाटोको ५ खेलबाट ८ अंक पुगेको छ ।