काठमाडौं (हाम्रो खेलकद)– कतार एअरवेज सहिद स्मारक ए डिभिज लिगको शीर्षताको दौडमा रहेका दुई टोलीले शुक्रबार अलग अलग खेलमा प्रतिस्पर्धा गर्नेछन् । दशरथ रंगशालामा सुरु हुने पाँचौं चरणको पहिलो खेलमा दिउँसो १:०० बजे सातदोबाटो युथ क्लब र त्रिभुवन आर्मी फुटबल क्लबबीच प्रतिस्पर्धा हुनेछ ।

दिउँसो ४:४५ बजे सुरु हुने खेलमा संकटा क्लब र मच्छिन्द्र फुटबल क्लबले एकअर्काको सामना गर्नेछन् । साविक विजेता समेत रहेको शीर्षस्थानमा मच्छिन्द्र र तेस्रो स्थानमा रहेको आर्मीका लागि आउने तीन चरणका खेल महत्वपूर्ण हुनेछन् । क्लब लाइसेन्स प्राप्त नेपाली ४ क्लबमध्ये मच्छिन्द्र र आर्मी पनि हुन् ।

सातौं चरणको समाप्तीमा मच्छिन्द्र, आर्मीसहित ४ क्लबमध्ये जो अंक तालिकाको सबैभन्दा माथि रहन्छ सोहि टोलीले एएफसी कपको छनोट चरणमा नेपालको प्रतिनिधित्व गर्नेछ । लाइसन्स प्राप्त गर्ने अन्य दुई टोलीमा दोस्रो स्थानको मनाङ मर्स्याङ्दी क्लब र पुछारमा रहेको एपिएफ फुटबल क्लब छन् । एपिएफ पुछारमा रहेका कारण उसको एएफसी कपमा जाने सम्भावना कम देखिन्छ । त्यसअर्थ मच्छिन्द्र, मनाङ र आर्मी मध्ये एउटा टोलीले एएफसी कपको छनोट खेल्नेछ ।

आर्मी र मच्छिन्द्रले एएफसी कप छनोटको दाबेदारीलाई बलियो बनाउने क्रममा शुक्रबारको खेल जित्नका लागि प्रयास गर्नेछन् । तर आर्मी र मच्छिन्द्र दुवैका लागि सहज भने हुनेछैन । आर्मीले ७ अंक जोडेको नवप्रवेशी सातदोबाटोको सामना गर्दैछ ।

मच्छिन्द्रले पनि अर्को अपराजित टोली संकटाको चुनौतीलाई पार गर्न सहज नहुन सक्छ । लिगमा शीर्ष चार मच्छिन्द्र, मनाङ, आर्मी र संकटामात्र अपराजित छन् । मच्छिन्द्र र मनाङको समान १० तथा आर्मी र संकटाको समान ८ अंक छ ।