काठमाडौं (हाम्रो खेलकुद) – अनुभवी फरवार्ड कर्ण लिम्बुले कतार एअरवेज सहिद स्मारक ए डिभिजन लिगमा च्यासल युवा क्लबबाट खेल्ने भएका छन् ।

गत सिजन संकटा क्लबबाट खेलेका कर्ण यस सिजनको सुरुवातमा भने कुनै क्लबमा आबद्ध थिएनन् । त्यसअघिको सिजन उनी हिमालयन शेर्पा क्लबमा आबद्ध रहेका थिए । च्यासलले यस सिजनभरका लागि कर्णलाई अनुबन्ध गरेको क्लबका व्यवस्थापक शंकर व्यन्जनकारले जानकारी दिए ।

‘कर्णलाई यस सिजनका लागि अनुबन्ध गरेका छौं । उनले बुधबारदेखि नै प्रशिक्षण सुरु गरिसकेका छन् । अर्को खेलमा उनी टोलीमा उपलब्ध हुनेछन्,’ व्यन्जनकारले भने । च्यासलले शनिबार हुने खेलमा जावलाखेलको सामना गर्दैछ । दशरथ रंगशालामा हुने खेल दिउँसो १ बजे सुरु हुनेछ ।

घरेलु लिगमा लामो अनुभव बोकेका फरवार्ड कर्णले च्यासलबाट खेल्न तयार रहेको बताए । ‘यस सिजनका लागि च्यासलमा अनुबन्धित भएको छु । यसअघि पनि लगातार खेल्दै आएको हुँ । स्थानीय स्तरका प्रतियोगितामा निरन्तर खेल्दै आएको छु । प्रशिक्षण हिजोदेखि सुरु गरेको हो, अब जावलाखेलविरुद्ध खेल्छु होला,’ ३६ वर्षीय लिम्बुले भने ।

कर्णले यसअघि जावलाखेल युवा क्लब र मच्छिन्द्र क्लबबाट ए डिभिजन तथा झापा ११ फुटबल क्लबबाट राष्ट्रिय लिग खेलिसकेका छन् । घरेलु फुटबलमा गोलकर्ताको पहिचान बनाएका कर्ण पछिल्लो समय भने मोफसल तथा भारतको स्थानीय प्रतियोगितामा व्यस्त रहँदै आएका थिए ।

च्यासलले लिगको ४ खेल सकिँदा ४ अंक जोडेको छ । पहिलो खेलमा थ्री स्टारसँग ३-० ले पराजित च्यासलले त्यसपछि एपिएफलाई १-० ले पराजित गरेको थियो । तेस्रो खेलमा एनआरटीसँग गोलरहित बराबरी खेलेको च्यासल त्रिभुवन आर्मी फुटबल क्लबसँग २-० ले पराजित भएको थियो ।

सन्तोष साहुखललाई अनुबन्ध गर्ने चर्चा चलेपनि उनी नेपाल नआउँदा च्यासलको आक्रमण कमजोर भएको छ । क्लबले सुशन लामा, विकास मेराग्लिया, राजीव लोप्चनलाई फरवार्डको रुपमा प्रयोग गर्दै आएको छ । कर्णको आगमनसँगै युवा आक्रमणमा केहि अनुभव थपिने भएको छ ।