सुबास हुमागाईं, काठमाडौं

सहिद स्मारक ए डिभिजन लिग अन्तर्गत चौथो चरणको खेल समापन भइसकेको छ । हरेक टोलीले १३ खेल खेल्ने लिगको झन्डै एक चौथाई खेल सकिँदा साफ च्याम्पियनसिप २०२१ मा राष्ट्रिय टोलीमा रहेका खेलाडीको प्रदर्शनमा दर्शकहरुको विशेष नजर रहेको थियो ।

इतिहासमै पहिलो पटक साफ च्याम्पियनसिपको फाइनलमा पुगेको टोलीका २३ खेलाडीमध्य कप्तान किरण चेम्जोङ र मिडफिल्डर रोहित चन्द विदेशी लिगमा खेल्दै आएका छन् । किरण यसै सिजन माल्दिभ्सको माजिया फुटबल क्लब तथा रोहित लामो समयदेखि इन्डोनेसियाको पर्सिजा जाकार्तामा अनुबन्धित रहेका छन् ।

फरवार्ड नवयुग श्रेष्ठ प्रि-सिजनको खेलका दौरान चोट बोकेपछि लिगमा उपस्थित छैनन् । उनले सम्भवत: यस सिजन लिगका कुनै खेल खेल्ने छैनन् । बाँकी रहेका २० खेलाडीले ए डिभिजन लिगमा आ-आफ्नो टोलीका लागि खेल्दै आएका छन् । अधिकांश राष्ट्रिय खेलाडीले आफ्नो स्तरअनुसार प्रदर्शन गर्दै आएका छन् । तर केहि खेलाडीका लागि भने लिग सोचेजस्तो हुन सकेको छैन । धेरै खेलाडीले लगातार सुरुवाती रोजाइमा खेलिरहेका छन् ।

प्रस्तुत छ हरेक खेलाडीको व्यक्तिगत तथ्यांक र प्रदर्शनबारे विश्लेषण :

दीप कार्की

पोजिसन : गोलरक्षक

क्लब : हिमालयन शेर्पा क्लब

खेल : ३

मिनेट : २९२

प्रदर्शन :

गोलरक्षक दीपले शेर्पाका लागि ४ मध्य ३ खेलमा खेलेका छन् । पहिलो खेलमा संकटासँग १-१ को बराबरी र दोस्रो खेलमा मनाङसँग १-० को हार बेहोर्दा टोलीमा रहेका उनी पुलिसविरुद्ध १-१ को बराबरीमा भने बेन्चमा रहे । चौथो खेलमा मच्छिन्द्रविरुद्ध ३-० को हारमा पनि उनले पोस्ट सम्हाले । हालसम्म केहि सुन्दर बचाउ गरेका उनको केहि निर्णयमा भने प्रश्न उठाउने ठाउँ छ । किशोर गिरी दोस्रो रोजाइमा रहेकाले पनि उनलाई सुरुवाती ११ मा स्थान बचाउन दबाब छ ।

विशाल श्रेष्ठ

पोजिसन : गोलरक्षक

क्लब : मच्छिन्द्र

खेल : ४

मिनेट : ३८८

प्रदर्शन :

मैदानको सबै कुनामा स्टार खेलाडीले भरिएको मच्छिन्द्रको लागि विशालले राम्रो प्रदर्शन गरेका छन् । कमै मात्र परिक्षण हुने गरेका विशालले आवश्यक परेको अवस्थामा राम्रो बचाउ गरेका छन् । ४ मध्य ३ खेलमा क्लिन सिट राखेका उनले लिगमा एक गोल मात्र खाएका छन् । लिगको पहिलो खेलमा एनआरटीका एरिक विष्टले गरेको सानदार फ्रिकिक प्रहार नै उनले खाएको एकमात्र गोल हो ।

अनन्त तामाङ

पोजिसन : डिफेन्डर

क्लब : थ्री स्टार

खेल : ४

मिनेट : ३८८

प्रदर्शन :

थ्री स्टारमा डिफेन्सको नेतृत्व गरिरहेका अनन्तले लिगमा पूरै समय खेलेका छन् । लिगमा आक्रमण र मिडफिल्ड कमजोर हुँदा थ्री स्टारले राम्रो प्रदर्शन नगरेपनि डिफेन्समा प्रश्न उठाउने सायदै ठाउँ छ । ४ मध्य २ खेलमा टोलीले क्लिन सिट राखेको छ । सेट पिसमा अनन्तले एक गोल समेत गरिसकेका छन् । उनको नाममा फ्रेन्ड्सविरुद्ध बराबरीमा एक पहेंलो कार्ड पनि छ ।

दीनेश राजवंशी

पोजिसन : डिफेन्डर

क्लब : मनाङ मर्स्याङ्दी

खेल : ४

मिनेट : ३९१

प्रदर्शन :

सम्भवत यसपटक लिगका उत्कृष्ट खेलाडी मध्यमा दीनेश पनि गनिन्छन् । मनाङका लागि सेन्टर डिफेन्समा खेलिरहेका उनले टोलीलाई सेट पिसमार्फत महत्त्वपूर्ण गोल समेत गरेका छन् । डिफेन्समा तीन क्लिन सिट राखेका उनले दुई गोल गरेका छन् । उनी जावलाखेलविरुद्ध १-० को जितमा निर्णायक गोल गरेपछि प्लेयर अफ द म्याच समेत घोषित भएका थिए ।

गौतम श्रेष्ठ

पोजिसन : डिफेन्डर

क्लब : त्रिभुवन आर्मी

खेल : ४

मिनेट : ३६६

प्रदर्शन :

गौतमले आर्मीको राइट ब्याक पोजिसनमा खेल्दै राम्रो प्रदर्शन गरेका छन् । आर्मीको आक्रमणमा समेत योगदान दिँदै आएका च्यासलविरुद्ध खेलमा जगजित श्रेष्ठका लागि सुन्दर असिस्ट समेत दिएका थिए । आर्मीका लागि ४ मध्य ३ खेलमा पूरा समय मैदानमा बिताएका उनले अनुभवी डिफेन्डर दिपक गुरुङलाई बेन्चमा नै सिमित राखेका छन् ।

सुमन अर्याल

पोजिसन : डिफेन्डर

क्लब : त्रिभुवन आर्मी

खेल : २

मिनेट : १४५

प्रदर्शन :

लिगको दोस्रो खेलमा चोट बोकेपछि सुमनले त्यसयता खेलेका छैनन् । लिगअघि नै ढाडको सामान्य समस्या बोकेका उनको दोस्रो खेलमा समस्या बल्झिएको थियो । उनले आउने खेलमा पुनरागमन गर्ने सम्भावना रहेको छ । सुमनको अनुपस्थितिमा आर्मीले टेकबहादुर बुढाथोकीलाई उक्त पोजिसनमा प्रयोग गरेको थियो ।

कमल थापा

पोजिसन : मिडफिल्डर

क्लब : हिमालयन शेर्पा

खेल : १

मिनेट : २४

प्रदर्शन :

चोटका कारण हिमालयन शेर्पाको टोलीमा पर्न संघर्ष गरिरहेका कमलले चौथो खेलमा बेन्चबाट मैदान प्रवेश गरेका थिए । शेर्पाको रणनीतिमा यसैपनि स्थान बनाउन कठिन देखिने उनलाई चोटले पनि पिरोलेको छ । शेर्पाको तीव्र गति र निरन्तर दबाब दिनुपर्ने शैलीमा उनलाई भिज्न कठिन हुने देखिन्छ । प्राविधिक रुपमा निपुण उनले मच्छिन्द्रविरुद्ध केहि समय बिताउँदा पनि मिडफिल्डमा संघर्ष नै गरे ।

नितिन थापा

पोजिसन : मिडफिल्डर

क्लब : मनाङ मर्स्याङ्दी

खेल : ४

मिनेट : २४८

प्रदर्शन :

युवा मिडफिल्डर नितिन थापाले मनाङका लागि सबै ४ खेलमा उपस्थिति जनाएका छन् । तर उनले कुनैपनि खेलमा पूरा समय मैदानमा बिताएका छैनन् । ३ खेलमा सुरुवात गरेका उनी सबै खेलमा परिवर्तन भए । दोस्रो खेलमा शेर्पाविरुद्ध उनी बेन्चबाट आएका थिए । मिडफिल्डमा चलायमान रहने उनले आक्रमणमा भने सिधा योगदान दिन सकेका छैनन् । भारतीय मिडफिल्डर दयानन्द सिंहको चोटसँगै अब उनीसँगै रुपेश केसी र विश्व अधिकारीमाथि जिम्मेवारी थपिनेछ ।

पुजन उपरकोटी

पोजिसन : मिडफिल्डर

क्लब : मनाङ मर्स्याङ्दी

खेल : ४

मिनेट : ३९१

प्रदर्शन :

साफ च्याम्पियनसिपमा उत्कृष्ट प्रदर्शन गरेका पुजनले आफ्नो राष्ट्रिय टोलीको लयलाई लिगमा पनि निरन्तरता दिएका छन् । राष्ट्रिय टोलीमा झैँ रक्षात्मक मिडफिल्डरको भूमिकामा अब्बल उनले मनाङमा आक्रमणमा पनि योगदान दिएका छन् । मनाङको लागि सेट पिसमा २ असिस्ट दिएका उनले आफूलाई हालसम्म कुनै कार्ड पनि प्राप्त गरेका छैनन् । हरेक मिनेट मैदानमा अनुशासित रहँदै टोलीको मेरुदण्ड बनेका पुजन लिगकै उत्कृष्ट प्रदर्शन गर्नेमा पर्छन् ।

सन्तोष तामाङ

पोजिसन : मिडफिल्डर

क्लब : त्रिभुवन आर्मी

खेल : ४

मिनेट : ३९५

प्रदर्शन :

सन्तोष तामाङबाट आर्मीले सधैं धेरै नै अपेक्षा राखेको छ । ४ खेलमा नै सुरुवात गर्दै २ असिस्ट प्रदान गरिसकेका उनको प्रदर्शन अझै शत प्रतिशत नरहेको प्रशिक्षक नविन न्यौपानेले बताउँदै आएका छन् । त्यसो त आर्मीको आक्रमण केहि फितलो हुनुमा सन्तोष पूर्ण रुपमा खेलमा नभिज्नु पनि हो । राष्ट्रिय टोलीमा निकै कम अवसर पाएका उनले आर्मीबाट आफूलाई सिद्ध गर्नुछ ।

सुजल श्रेष्ठ

पोजिसन : मिडफिल्डर

क्लब : मच्छिन्द्र

खेल : ४

मिनेट : ३८५

प्रदर्शन :

जुनसुकै पोजिसनमा पनि खेल्न सक्ने क्षमताले गर्दा सुजल नेपाली फुटबलमा सदाबहार खेलाडीका रुपमा चिनिन्छन् । यसपटक मच्छिन्द्रले पनि सुजलको यो क्षमतालाई भरपुर सदुपयोग गरेको छ । करिअरको अधिकांश समय लेफ्ट विंगमा बिताएका सुजल मच्छिन्द्रमा सेन्टर मिडफिल्डमा धेरै व्यस्त देखिन्छन् । टोलीको आवश्यकताअनुसार विंगमा पनि खेल्ने सुजलले निरन्तर आफ्नो स्तर अनुसार प्रदर्शन गरेका छन् । लिगको पहिलो खेलमा विजयी गोलमा असिस्ट समेत दिएका सुजलको नेतृत्वमा मच्छिन्द्र लिग जोगाउन प्रयासरत छ ।

आयुष घलान

पोजिसन : मिडफिल्डर

क्लब : थ्री स्टार

खेल : ४

मिनेट : २७४

प्रदर्शन :

लिगमा थ्री स्टारका लागि सबै ४ खेलमा उपस्थित आयुषले कुनै खेलमा पूरा समय मैदानमा बिताएका छैनन् । सामान्यतया उनको उमेरलाई हेरेर कम समय दिनुपर्ने भएपनि यसपटक उनको प्रदर्शन नै बिर्सनलायक छ । एपिएफविरुद्ध पहिलो रोजाइमा नपरेका उनले थ्री स्टारको आक्रमणमा सायदै उल्लेख्य योगदान दिन सकेका छन् । क्लबले उनको विकल्पमा खोज्न थाल्नुले नै आयुषले आफ्नो प्रदर्शनमा सुधार गर्नुपर्छ भन्ने सिधा संकेत हो ।

विशाल राई

पोजिसन : मिडफिल्डर

क्लब : मच्छिन्द्र

खेल : ४

मिनेट : ३५६

प्रदर्शन :

मच्छिन्द्रको मिडफिल्डमा जमेका विशालले लिगका सबै खेलमा सुरुवात गरेका छन् । प्रशिक्षक प्रवेश कटुवालले सुरुवाती दुई खेलमा उनी केहि थकित रहेका कारण पूरा समय नबिताएको बताएका थिए । तर नियमित उत्कृष्ट प्रदर्शन गरिरहेका उनले मच्छिन्द्रको उपाधि रक्षामा महत्त्वपूर्ण भूमिका निर्वाह गर्ने पक्का छ । आक्रमणमा अन्तिम पास दिन माहिर उनले २ असिस्ट प्रदान गरिसकेका छन् ।

सुरज ज्यु ठकुरी

पोजिसन : मिडफिल्डर

क्लब : जावलाखेल

खेल : ४

मिनेट : ३२३

प्रदर्शन :

जावलाखेलको मिडफिल्डलाई चलायामन बनाइरहेका सुरज ज्यु ठकुरीको प्रदर्शन औसत रहेको छ । प्रशिक्षक किशोर केसीले आफ्नो रणनीतिमा सुरज भिज्न नसकेको गुनासो गरेपनि उनी जावलाखेलबाट उत्कृष्ट प्रदर्शन गर्नेमा पर्छन् । आक्रमणले राम्रो प्रदर्शन नगर्दा पनि उनको मिहिनेत नतिजामुखी हुन सकेको छैन । जावलाखेलले पहिलो अंक जोडेको खेलमा उनी प्लेयर अफ द म्याच पनि घोषित भएका थिए । ४ मध्य तीन खेल सुरुवात गरेका उनको प्रदर्शनमा जावलाखेलको अंक निर्भर हुने देखिन्छ ।

तेज तामाङ

पोजिसन : मिडफिल्डर

क्लब : पुलिस

खेल : ४

मिनेट : ३८४

प्रदर्शन :

राष्ट्रिय टोलीमा बक्स टु बक्स मिडफिल्डरको भूमिका निर्वाह गर्दै आएका तेज पुलिसको टिममा बढी रक्षात्मक भूमिकामा देखिँदै आएका छन् । सबै ४ खेलमा पूरा समय मैदान बिताएका उनले आफ्नो आक्रमणमा योगदान दिने क्षमता पहिलो खेलमा पनि प्रस्तुत गरेका थिए । सदाबहार तेजको प्रदर्शन राष्ट्रिय टोलीबाट पुलिससम्म पनि एकनासकै रहेको छ ।

सुमन लामा

पोजिसन : फरवार्ड

क्लब : पुलिस

खेल : ४

मिनेट : २८१

प्रदर्शन :

राष्ट्रिय टोलीमा नियमित स्थान बनाउँदै आएको सुमनबाट पुलिसले धेरै नै अपेक्षा राखेको थियो । प्रशिक्षक अनन्तराज थापाले सुमनबाट अपेक्षा अनुसार प्रदर्शन हुन नसकेको सार्वजनिक रुपमै बोलेका पनि छन् । लिगका ४ मध्य ३ खेलमा मात्र सुरुवात गरेका उनले पछिल्लो खेलमा पहिलो हाफ मात्र खेल्न पाए । मिहिनेतमा कुनै कमी नदेखिएपनि टोलीको रणनीति अबलम्बन र व्यावसायिकता पूरा गर्न नसकेको दुखेसो प्रशिक्षकले बताएका छन् ।

सुनिल बल

पोजिसन : फरवार्ड

क्लब : मच्छिन्द्र

खेल : ४

मिनेट : २९५

प्रदर्शन :

फरवार्डमा निकै प्रतिस्पर्धा रहेको मच्छिन्द्रमा सुनिलले आफ्नो छनोटलाई सिद्ध पारेका छन् । पहिलो खेलमा दुवै गोल गरेका उनले पछिल्लो जितमा पनि सुरुवाती अग्रता दिलाएका थिए । राम्रो प्रदर्शन गरेपनि तेस्रो खेलमा बेन्चबाट आएका उनले आक्रमणमा प्रभाव जमाउँदै आएका छन् । यसै सिजन मच्छिन्द्र आएका ३ गोलसहित संयुक्त रुपमा लिगको सर्वाधिक गोलकर्ता पनि हुन् ।

आशिष लामा

पोजिसन : फरवार्ड

क्लब : एपिएफ

खेल : ४

मिनेट : ३९२

प्रदर्शन :

राष्ट्रिय टोलीमा कमै अवसर पाएका आशिष लामाले एपिएफका लागि लिगको पहिलो खेलमा नै गोल गरेपनि टोलीलाई सकारात्मक नतिजा दिलाउन सकेका छैनन् । एपिएफका लागि सबै खेलमा पूरा समय मैदानमा बिताएका उनले टोलीको मिडफिल्डबाट अपेक्षित साथ नपाउँदा सोचेअनुसार प्रदर्शन गर्न सकेनन् । एपीएफले विदेशी खेलाडी थप्ने प्रक्रिया चालेसँगै आशिषबाट पनि नतिजामुखी प्रदर्शनको अपेक्षा गर्न सकिन्छ ।

अन्जन विष्ट

पोजिसन : फरवार्ड

क्लब : मनाङ मर्स्याङ्दी

खेल : ४

मिनेट : ३९१

प्रदर्शन :

मनाङको कप्तानी सम्हाल्दै आक्रमणमा अग्रणी भूमिका खेलिरहेका अन्जनले राम्रो प्रदर्शन गरिरहेका छन् । तथ्यांकमा उनको नाममा एक असिस्ट मात्र रहेका उनको मनाङको अग्रपंक्तिमा निकै प्रभाव रहने गरेको छ । प्रशिक्षक तोपे फुजाको आगमन र मनाङले घरेलु मैदानमा खेल्नु अन्जनको लागि सकारात्मक खबर हुन सक्छ । विदेशी फरवार्डद्वय ओलाडिपो आफिज र अडेलाजा सोमिडेले सुधारिएको प्रदर्शनले पनि उनलाई थप हौसला मिल्ने देखिन्छ ।

मनिष डाँगी

पोजिसन : फरवार्ड

क्लब : मच्छिन्द्र

खेल : ४

मिनेट : २३५

प्रदर्शन :

सुरुवाती दुई खेलमा बेन्चबाट मैदान प्रवेश गरेका मनिषले पछिल्ला दुवै खेल सुरुवात गरेका छन् । तर कुनैपनि खेलमा उनी पूरा समय मैदानमा बिताएका छैनन् । तीव्र गतिसँग बल बढाउन माहिर मनिषले आफ्नो क्षमताको छनक देखाएका छन् । तर प्रदर्शनमा एकरूपता नहुँदा उनले तीव्र प्रतिस्पर्धा रहेको अग्रपंक्तिमा नियमित सुरुवाती स्थान बनाउन कठिन छ ।