काठमाडौं (हाम्रो खेलकुद)– संकटा क्लबसँग कतार एअरवेज सहिद स्मारक ए डिभिजन लिगमा सोमबार १–० ले पराजित भएपछि नेपाल पुलिस क्लबका प्रशिक्षक अनन्त थापाले आफ्नो खेलाडीको आलोचना गरेका छन् ।

‘नाम चलेकै खेलाडीले नाम अनुसार खेल्न सकेनन्’, उनले भने, ‘फुटबलमा यस्तो हुन्छ ।’ खासगरि उनले टोलीका मिडफिल्डर सुमन लामाको प्रदर्शनमा प्रश्न उठाए ।

‘साफ च्याम्पियनसिपमा श्रीलंकाविरुद्ध गोल गरेको खेलाडी हो । उबाट अपेक्षा त हुन्छ नै । ठूलो खेलाडी भएर त्यहि अनुसारको व्यवसायिकता पनि देखाउनुपर्छ । सुधार गर्नुपर्ने हुन्छ’, उनले भने, ‘आफ्नो जिम्मेवारी बुझ्नुपर्छ । विशेषत सेट पिसमा उनलाई डिबक्समा नजानु भनेका थियौं । उ जाँदा अन्य खेलाडी अलमल भए ।’

थापाले संकटाविरुद्ध ३ अंक गुमाउँदा टोलीको उपाधि दौडमा महंगो परेको बताए । ‘आज जितेको भए उपाधि दौडमा रहन्थ्यौं । अब अरुको नतिजामा भर पर्नुपर्ने भयो । आज रिदम मिलेन । किन मिलेन मलाई थाहा भएन’, उनले भने, ‘भन्न मिलेन । यसमा धेरै कुरा छ । पहिलो हाफ र दोस्रो हाफमा प्रदर्शन नै फरक छ । खेलाडी परिवर्तन गरेपछि हामीले खेलमा नियन्त्रण गर्यौं ।’

दोस्रो जितपछि संकटाका प्रशिक्षक विष्णु गुरुङ भने खुसी थिए । ‘व्यक्तिगत रुपमा दोस्रो जितमा म खुसी छु । पुलिस टिम आक्रामक छ । सुमन, तेज तामाङ आक्रमक र तीब्र गतिमा खेल्छन्’, उनले भने, ‘रवि पासवानलाई त्यहि अनुसार युज गर्छन् ।’

गोल गरेपछि अंक जोगाउनमा केन्द्रित भएको स्वीकार गर्दै गुरुङले भने, ‘गोल गरेपछि हामीले अंक जोगाउनेमा ध्यान दियौं । हामी हरेक खेलमा एक वा तीन अंक लिने उद्देश्यका साथ उत्रन्छौं ।’ उनले टोली शीर्ष ३ देखि छैटौं स्थानमा रहने आशा गरेको समेत बताए ।