काठमाडौं (हाम्रो खेलकुद) – ब्रिगेड ब्वाइज क्लब (बिबिसी) सँग बराबरी खेल्दै जावलाखेल युथ क्लबले कतार एअरवेज सहिद स्मारक ‘ए’ डिभिजन लिगमा पहिलो अंक जोडेको छ ।

बिबिसीसँग गोलरहित बराबरी खेलेपछि जावलाखेलले लिगको चौथो खेलबाट पहिलो अंक जोडेको हो । यसअघि जावलाखेलले सुरुवाती तीन खेलमै आर बेहोरेको थियो । जावलाखेलले मनाङ र पुलिससँग समान १–० को हार बेहोर्दा मछिन्द्रसँग २–० ले पराजित भएको थियो ।

त्रिपुरेश्वरस्थित दशरथ रंगशालामा सोमबार भएको खेलमा जावलाखेलले बिबिसीलाई दवावमा राख्दै आधा दर्जन बढी गोलको अवसर सिर्जना गरेपनि सदुपयोग गर्न नसक्दा जावलाखेलले अंक बाड्न बाध्य बन्यो । बिबिसीले पनि केही अवसर सिर्जना गरेपनि सदुपयोग गर्न सकेनन् ।

खेलको १३औं मिनेटमा रुप बहादुर लामाको प्रहारलाई गोलरक्षक एन्जल श्रेष्ठले डाइभ दिदै मुस्किलले बचाए । १४औं मिनेटमा गोलरक्षक एन्जल अघि बढेर गरेको क्लियरेनस ओनगुना निकेंगेकोलाई लाग्दै पोस्ट नजिकै ड्रप हुँदै बाहिरिदा जावलाखेल अग्रता लिनबाट चुक्यो ।

३०औं मिनेटमा रुप बहादुर लामाको त्रसमा ओनगुना निकेंगे जुनियर नियन्त्रणमा लिन नसकेको बललाई लोइस एनजिमी कोउहामिले गरेको प्रहार पोस्टनजिकैबाट बाहिरिदा जावलाखेल अग्रता लिनबाट चुक्यो । ४०औं मिनेटमा दिनेश राईको फ्रिकिकमा बर्टरान्ड इवोडे ओटोउको हेडरमा फ्लोरेन्ट कोराले ह्यान्ड गर्न पुगेपछि बीबीसीले पेनाल्टीको अपिल गरेपनि रेफ्री ज्ञान बहादुर तामाङले कुनै प्रतिक्रिया जनाएनन् ।

६३औं मिनेटमा कप्तान रोशन रानामगरको पासमा बर्टरान्ड इवोडे ओटोउले अफसाइड बिट ट्रयाप गर्दै नियन्त्रणमा लिएपनि उनको प्रहार फितलो बन्दा गोलरक्षक टिकेन्द्र सिंह थापाले सहजै नियन्त्रणमा लिए ।

यो बराबरीपछि बिबिसीको ४ खेलबाट ५ अंक पुगेको छ । समान ५ अंक नै रहेपनि बिबिसी थ्री स्टारसँग पछि पर्दै सातौ स्थानमा रहँदा पुलिस र एनआरटीभन्दा अघि छ । लिगमा पहिलो अंक जोडेको जावलाखेलले एपिएफलाई पछि पार्दै १३औं स्थानमा उक्लिएको छ ।