काठमाडौं (हाम्रो खेलकुद) – राजधानीमा जारी कतार एअरवेज सहिद स्मारक ‘ए’ डिभिजन लिगअन्तरगत आइतबार चौथो राउन्डमा एक खेलमा मात्रै प्रतिस्पर्धा हुँदा रुस्लान थ्री स्टार क्लब र नेपाल एपिएफ फुटबल क्लब आमने–सामने हुँदैछन् ।

खेल त्रिपुरेश्वरस्थित दशरथ रंगशालामा दिउँसो ४:४५ बजेपछि सुरु हुनेछ । थ्री स्टार दोस्रो तथा एपिएफ पहिलो जितको खोजीमा हुनेछ । थ्री स्टारले पहिलो खेलमा च्यासल युथ क्लबलाई ३–० ले हराएपनि त्यसपछिको दुई खेलमा जित निकाल्न सकेको छैन ।

थ्री स्टार दोस्रो खेलमा नव प्रवेशी सातदोबाटो युथ क्लबसँग १–० ले स्तब्ध हुँदा तेस्रो राउन्डको खेलमा फ्रेन्ड्स क्लबसँग १–१ गोलको बराबरीमा रोकिन पुगेको थियो । युवा खेलाडीका साथ यो सिजनको लिग खेलिरहेको टोलीले यसपटक राम्रो सुरुवात गरेपनि त्यसलाई निरन्तरता दिन सकेको छैन । टोलीले दुई खेलबाट ५ अंक गुमाइसकेको छ । थ्री स्टार ३ खेलमा ४ अंक जोडेर आठौँ स्थानमा रहेको छ ।

टोलीमा कप्तान विक्रम लामा, अनन्त तामाङ, सन्जोक राई, निशान खड्का, आयुष घलान, मिक्चेन तामाङ, प्रिसो, राफयल रिमगागो, हेमन्त थापामगर, रितिक खड्का, लाकेन लिम्बु, डोना थापा र मोआ रहेका छन् ।

यता, लिगमा जित दर्ता गर्न नसकेको एपिएफ थ्री स्टारलाई स्तब्ध पार्दै पहिलो जितको लक्ष्यमा मैदान उत्रनेछ छ । टोलीले राम्रो खेलेपनि जित निकाल्न सकेको छैन । आज एपिएफले नेपाली फुटबल इतिहासमा नै पहिलो पटक विभागीय टोलीबाट विदेशी खेलाडी खेलाउने सम्भावना रहेको छ । अंकविहीन हुदै पुछारमा रहेको एपिएफले थ्री स्टारलाई हराउन सके ११औं स्थानमा उक्लने छ ।

एपिएफले ब्रिगेड ब्वाइजसँग ३–२, च्यासलसँग १–० ले तथा सातदोबाटोसँग ४–१ ले पराजित भएको थियो । टोलीमा आशिष लामा, नवीन लामा, विकी तामाङ, रवि थिङ, श्याम नेपाली र अवास लामिछाने टोलीमा रहेका छन् । टोलीले विदेशी खेलाडीका रुपमा जापानी गोलरक्षक र अफ्रिकी डिफेन्डर खेलाउने चर्चा रहेको छ ।