प्रकाश तिमल्सिना, काठमाडौं

फुटबलमा सानै उमेरमा व्यक्तिगत र खेल जीवनमा उथलपुथल बेहोर्ने खेलाडीमा पर्छन् विमल घर्तीमगर । झण्डै एक दशक अघि १४ वर्षको उमेरमा राष्ट्रिय टोलीमा डेब्यू गरेको विमल फुटबल प्रेमीले निकै आशा गरेका फरवार्ड हुन् ।

विमलको कप्तानीमा ६ वर्षअघि नेपालले घरेलु मैदानमै यू १९ साफ च्याम्पियनसिपको उपाधि जितेको थियो । त्यसअघि नेपालमै आयोजना भएको सन् २०१३ को साफ च्याम्पियनसिपमा उनी चर्चाको शिखरमा पुगेका थिए । भनौ राता रात स्टार बनेका थिए ।

अन्तिम समयमा पाकिस्तानविरुद्ध गोल गर्दै साफ च्याम्पियनसिपको सेमिफाइनल पुग्ने आधार तयार पार्न भूमिका खेलेका उनी त्यसको केहि दिन सञ्चारमाध्यममा चर्चाको केन्द्रमा रहे । यू १९ जिताएयता उनी राष्ट्रिय टोलीका नियमित सदस्य थिए । उनीमात्र होइन त्यहि यू १९ टोलीका अन्जन विष्ट, अनन्त तामाङ र दीनेश राजवंशी नियमित रुपमा टोलीको सदस्य रहँदै आए ।

तर, विमलको व्यक्तिगत र खेल जीवन भने सरल रुपमा अघि बढेन । युरोपका विभिन्न क्लबमा प्रशिक्षणको मौका त पाए, तर त्यहि क्रममा याता स्वदेशमा भने वहिनीको मृत्यु भयो । त्यसले उनको व्यक्तिगत जीवनमा निकै उतारचढाव बेहोर्नुपर्यो ।

स्वदेशमा मात्र होइन माल्दिभ्स र भारतीय क्लबमा पनि उनले व्यवसायिक फुटबल खेल्ने मौका नपाएका होइनन् । तर, अपेक्षा अनुसार उनको प्रदर्शन हुन सकेन । त्यसका वावजुद पनि करिअर ठिक ठाक नै चल्दै थियो ।

तर, दुई वर्षअघि जब उनीसँग राष्ट्रिय टोलीका ४ जना अनुशासनको कारवाहीमा पर्दा धेरै समर्थक निराश भएका थिए । कुवेतविरुद्ध विश्वकप खेल्न भुटान जाने दिननै उनीहरुमाथि कारवाही भएको थियो । विमल ९० दिनको प्रतिबन्धमा परे । उनीसँग कारवाहीमा परेकाले स्वदेशमा भएको १३ औं दक्षिण एसियाली खेलकुद (साग) खेल्ने अवसर गुमाउनुपर्यो । १३ औं को स्वर्ण जित्ने टोलीको सदस्य बन्ने आफ्नै कारण पूरा हुन सकेन ।

कारवाही फुकुवा भएपछि उनी अघिल्लो सिजन लिगको अन्तिम खेलमा मच्छिन्द्र फुटबल क्लबबाट मैदान उत्रिए । त्यसपछि मोसफलका थुप्रै प्रतियोगिता पनि खेले । त्यहि बलमा गत वर्ष पुसमा उनी राष्ट्रिय टोलीको बन्द प्रशिक्षणमा फर्किए । तर, दुर्भाग्य । दैवको खेला अर्कौ थियो । उनी चोटग्रस्त हुन पुगे । घुँडामा गम्भिर चोट लाग्यो ।

धन्न उपचारका लागि अखिल नेपाल फुटबल संघ (एन्फा) ले कतार फुटबल संघको सहयोग माग्यो । झण्डै ९ महिना कतार बसेर असोजमा स्वदेश फर्किए ।

लिगका लागि फेरि मच्छिन्द्रमा आबद्ध भए । मच्छिन्द्रले जारी सिजनमा शनिबार चौथो खेल खेल्ने र तेस्रो जित निकाल्यो । विमलले सुरुवाती दुई खेलमा परिवर्तित खेलाडीका रुपमा मैदान प्रवेश गर्ने मौका पाए । औसत प्रदर्शन गरे । तेस्रो खेलमा मौकै पाएनन् । शनिबार फेरि परिवर्तित खेलाडीको रुपमा मैदान प्रवेश गर्ने मौका पाए ।

टोलीले हिमालयन शेर्पा क्लबलाई ३–० ले हरायो । टोलीको जित त निश्चित जस्तै भइसकेको थियो, त्यस्तोमा इन्जुरी समयमा विमलले गोल आफ्नो नाममा लेखाए । धेरै पछिको गोलले सायद उनलाई ठूलै राहत दिएको हुनुपर्दछ । फरवार्डहरुले जारी लिगमा गोल गर्न बाट चुकिरहेको पृष्ठभूमीमा विमलले पुरानै लयमा फर्कने संकेत गरेका छन् । यद्दपी अहिले उनी पुरानै लयमा देखिए भन्दा भने हतार हुन सक्छ । लिगमा अझै ९ चरणका खेल उनको टोलीले खेल्न बाँकी छ ।

गोल गरिसकेको साँझ तस्बिरसहित विमलले लेखे, ‘कहिलेकाहिँ मान्छेको जीवनमा उसको गन्तव्य तर्फको पाइलाहरुको रफ्तार भन्दा सहि दिशा तर्फ लम्किरहेका पाइलाहरुको एक एक कदमले महत्वपूर्ण भूमिका खेल्छ । सबैको माया र साथको लागि आभारी छु ।’

उनको आशय सहि बाटो हिड्ने प्रयास गरिरहेको छु भन्ने छ । गोल पछिको अनुभव साट्न भन्दा उनले यत्ति भने, ‘मसँग बोल्ने केहि शब्द नै छैन । खेलाडीले धेरै बोल्नै पर्दैन, उसको प्रदर्शनले नै बोल्छ ।’

आशा गरौं आउने दिनमा उनको प्रदर्शनले अझै धेरै बोल्नेछ ।