काठमाडौं (हाम्रो खेलकुद) – हिमालयन शेर्पा क्लबमाथि सहज जित निकाल्दै मछिन्द्र फुटबल क्लबले कतार एअरवेज सहिद स्मारक ‘ए’ डिभिजन लिगको शीर्षस्थानमा उक्लिएको छ । शेर्पालाई ३–० ले पराजित गरेपछि मछिन्द्रले मनाङलाई पछि पार्दै शीर्षस्थानमा कब्जा जमाएको हो ।

मछिन्द्रको जितमा सुनिल बल, नुर्लान नोभ्रुजोभ र बिमल घर्तीमगरले गोल गरे । सुनिलले पहिलो हाफमा तथा नुर्लान र बिमलले दोस्रो हाफमा गोल गरेका थिए । त्रिपुरेश्वरस्थित दशरथ रंगशलामा शनिबार भएको खेलको ११औं मिनेटमा नुर्लान नोभ्रुजोभको सशक्त प्रहार क्रसबारमा लाग्दै बाहिरिदा मछिन्द्र अग्रता लिनबाट चुक्यो ।

रन्जित धिमालको क्रसलाई शेर्पाका सन्जत राईले नभेटेको बललाई नुर्लानले वान भर्सेस वानकै अवस्थामा गरेको प्रहार क्रसबारमा लाग्दै बाहिरिएको थियो । २२औं मिनेटमा सुनिल बलको फ्रिकिकलाई गोलरक्षक दीप कार्कीले पञ्च गर्दै बचाए । २९औं मिनेटमा सुनिल बलले गोल गर्दै मछिन्द्रलाई १–० को अग्रता दिलाए । ओमोलाजा नुरेन करिमको फ्रिकिकमा गोलरक्षक पोजिसनभन्दा अघि बढ्दा सुनिलले वान टचमा गोल गर्न सफल भएका थिए ।

जारी लिगमा सुनिलको यो तेस्रो गोल हो । यसअघि उनले एनआरटीविरुद्धको जितमा दुई गोल गरेका थिए । ३२औं मिनेटमा मनिष डाँगीको प्रहार दोस्रो बार च्याप्दै बाहिरिदा मच्छिन्द्र अग्रता दोब्बर पार्नबाट चुक्यो ।

४७औं मिनेटमा सुरेश कुमालको प्रहारलाई गोलरक्षक विशाल श्रेष्ठले पञ्च गर्दै बचाउँदा शेर्पा बराबरीबाट चुक्यो । ६७औं मिनेटमा नुर्लान नोभ्रुजोभले गोल गर्दै मछिन्द्रको अग्रता दोब्बर पारे ।

इन्ज्युरी समयको थप गरिएको दोस्रो मिनेटमा सब्सिच्युट फरवार्ड बिमल घर्ती मगरले गोल गर्दै मछिन्द्रको जित पक्का गरे । ७३औं मिनेटमा मनिष डाँगीको स्थानमा मैदान छिरेका बिमलले आन्द्रेस नियाले मैदानको मध्यभागबाट बल एक्लै अघि बढाउँदै क्लोज रेन्जबाट दिएको पासमा अनमार्क रहेका बिमलले सहजै फिनिस गरेका थिए ।

जितसँगै अपराजित रहेको मछिन्द्र ४ खेलबाट १० अंक जोडेर शीर्षस्थानमा उक्लिएको हो । समान १० अंक नै रहेपनि गोल अन्तरमा मछिन्द्र अघि रहेको छ । दोस्रो स्थानको अपराजित मनाङको पनि १० अंक नै रहेको छ । पराजित शेर्पा ४ खेलबाट २ अंक जोडेर १२औं स्थानमा रहेको छ ।