काठमाडौं (हाम्रो खेलकुद)– सातदोबाटो युथ क्लब र मच्छिन्द्र फुटबल क्लबले कतार एअरवेज सहिद स्मारक ए डिभिजन लिगमा शनिबार अलग अलग खेलमा प्रतिस्पर्धा गर्दैछन् । शीर्षस्थानको प्रतिस्पर्धामा रहेका सातदोबाटो र मच्छिन्द्र दुवैको समान ७ अंक छ । शुक्रबार आ आफ्नो खेल जित्दै मनाङ मस्र्याङ्दी क्लब शीर्ष र त्रिभुवन आर्मी फुटबल क्लब दोस्रो स्थानमा उक्लेका छन् ।

दशरथ रंगशालामा जारी लिगमा शनिबार पहिलो खेलमा सातदोबाटोले एनआरटीको सामना गर्नेछ । खेल दिउँसो १ः०० बजे सुरु हुनेछ । मच्छिन्द्र र हिमालयन शेर्पा क्लबबीचको खेल भने दिउँसो ४ः४५ बजे सुरु हुनेछ । तेस्रो स्थानको सातदाबाटो र चौथाको मच्छिन्द्र अघिल्ला तीन खेलमा समान २ जित र १ बराबरी खेलेका छन् । समान २ अंक जोडेका हिमालयन शेर्पा १० औं र एनआरटी ११ औं स्थानमा छ । दुवै टोली पहिलो जितको खोजीमा छन् ।

पहिलो खेलमा एनआरटीलाई २–१ ले हराएको मच्छिन्द्रले दोस्रो खेलमा आर्मीसँग गोलरहित बराबरी खेलेको थियो । अर्को खेलमा भने जावलाखेललाई २–० ले हराएको थियो । फ्रेन्ड्ससँग गोलरहित बराबरी खेलेको सातदोबाटो थ्री स्टारलाई १–० ले र एपिएफलाई ४–१ ले हराएको थियो ।

शेर्पाले पहिलो खेलमा संकटासँग १–१ को बराबरी, मनाङसँग १–० हार र पुलिससँग १–१ बराबरी खेलेको थियो । मछिन्द्रसँग २–१ को हार बेहोरेको एनआरटीले ब्रिगेड ब्वाइज क्लबसँग गोलरहित र च्यासलसँग १–१ को बराबरी खेलेको थियो ।