एजेन्सी – यूईएफए च्याम्पियन्स लिग अन्तर्गत अन्तिम १६ को खेलमा फ्रान्सेली क्लब पेरिस सेन्ट जर्मेनले कठिन प्रतिद्वन्द्वीको सामना गर्नुपर्ने देखिएको छ ।

समूह ए बाट उपविजेताको रुपमा अघि बढेको पिएसजीले उपाधि दाबेदार टोलीहरुको सामना गर्ने समीकरण अघि आएको छ । समूह विजेता म्यानचेस्टर सिटीलाई तुलनात्मक रुपमा सहज प्रतिद्वन्द्वी पर्ने सम्भावना छ । समूह जी बाट लिल समूह विजेता बनेपछि पिएसजीले आफ्नै देशको क्लबसँग खेल्नुपर्ने छैन । त्यसबाहेक अन्य सबै समूहको विजेता उपाधिका दाबेदार नै रहेका छन् ।

अब पिएसजीले अन्तिम १६ मा भेट्ने सबैभन्दा सहज प्रतिद्वन्द्वी नै आयाक्स रहेको छ । तर आयाक्सले यस सिजन च्याम्पियन्स लिगमा ऐतिहासिक प्रदर्शन गरेको छ । पहिलो पटक समूहका सबै ६ खेल जितेको आयाक्सले उत्कृष्ट प्रदर्शन गरिरहेको छ ।

यसबाहेक पिएसजीको सम्भावित प्रतिद्वन्द्वीमा लिभरपुल, रियल म्याड्रिड, बायर्न म्युनिख, म्यानचेस्टर युनाइटेड र युभेन्टस रहेका छन् । प्रशिक्षक माउरिसियो पोचेटिनोले प्रिमियर लिग च्याम्पियन म्यानचेस्टर सिटीसँग एकै समूहमा खेलेका कारण अन्त्तिम १६ मा सामना गर्नु पर्दैन ।

अन्तिम १६ मा छनोट हुने टोलीले आफ्नो देशको लिग र आफ्नै समूहको प्रतिद्वन्द्वीसँग खेल्नु पर्दैन । यसकारण पनि पिएसजीलाई थप कठिनाई भएको हो । अन्तिम १६ मा समूह विजेताले अर्को समूहको उपविजेतासँग खेल्नेछ । अन्तिम १६ चरणको ड्र सोमबार हुँदैछ ।

समूह विजेता : म्यानचेस्टर सिटी, लिभरपुल, आयाक्स, रियल म्याड्रिड, बायर्न म्युनिख, म्यानचेस्टर युनाइटेड, लिल, युभेन्टस

समूह उपविजेता : पिएसजी, एटलेटिको म्याड्रिड, स्पोर्टिङ लिस्बन, इन्टर मिलान, बेन्फिका, भिल्लारियल, रेड बुल साल्जबर्ग, चेल्सी

यो पनि पढ्नुहोस : रियलले चेल्सी वा पिएसजीसँग खेल्ने सम्भावना