प्रकाश तिमल्सिना, काठमाडौं

कतार एअरवेज सहिद स्मारक ए डिभिजन लिगको सातौं चरणको समाप्तीमा एएफसी क्लब लाइसेन्स प्राप्त ४ क्लब मध्ये अंकतालिकाको सबैभन्दा माथि रहने टोलीले एफसी कपको छनोट चरण खेल्ने भएको छ ।

दशरथ रंगशालामा जारी लिग खेलिरहेका १४ क्लब मध्ये साविक विजेता मछिन्द्र फुटबल क्लब, मनाङ मर्स्याङ्दी क्लब, त्रिभुवन आर्मी फुटबल क्लब र एपिएफ फुटबल क्लबले मात्र एएफसी क्लब लाइसेन्स प्राप्त गरेका छन् । एएफसी लाइसेन्स प्राप्त गरेका यी ४ क्लबले मात्र नेपालबाट एसियाली फुटबल महासंघ (एएफसी) को आधिकारिक प्रतियोगिता खेल्न पाउनेछन् ।

लिगमा तीन चरणको खेल समाप्त भइसकेको छ । अब थप ४ चरणको खेलपछि माथिल्लो स्थानमा रहने ४ मध्येको एक टोलीले एएफसी कप खेल्ने अखिल नेपाल फुटबल संघ (एन्फा) का महासचिव इन्द्रमान तुलाधरले जानकारी दिए ।

‘एएफसीको समय सिमा त मंसिर १८ गते सम्म सहभागी क्लबको नाम पठाउनु पर्ने भन्ने थियो । हामीले अनुरोध गरेर केहि समय माग गरेका छौं,’ उनले भने, ‘पुसको २२ गते सम्म हामीले सहभागी क्लबको नाम पठाउने समय मागेका छौं । पुस १९ गते सम्म सातौं चरणको खेल सकिन्छ । सात चरण सकिँदा ४ क्लबमध्ये अंक तालिकाको माथी रहने टोली नै नाम एएफसी कपको छनोटका लागि पठाउने छौं ।’

बुधबार लिगको तेस्रो चरणको समाप्तीमा अंक तालिकाको दोस्रो स्थानमा रहेको मछिन्द्र र तेस्रो स्थानको मनाङको समान ७ अंक छ । आर्मी ५ अंकका साथ छैटौं स्थानमा छ भने अंकविहिन एपिएफ पुछारमा छ ।

गत सिजन मछिन्द्रसँग क्लब लाइसेन्स नभएकै कारण दोस्रो स्थानको आर्मीले एफसी कपको समूह चरणमा प्रतिस्पर्धा गरेको थियो । त्यति बेला आर्मीसँग मात्रै क्लब लाइसेन्स थियो । यो वर्ष थप तीन क्लबले मापदण्ड पूरा गर्दै लाइसेन्स प्राप्त गरेपछि क्लब संख्या ४ पुगेको हो ।