काठमाडौं (हाम्रो खेलकुद) – हिमालयन शेर्पा क्लब र विभागीय नेपाल पुलिस क्लबले कतार एअरवेज सहिद स्मारक ‘ए’ डिभिजन लिगमा बराबरी खेल्दै अंक बाँडेका छन् ।

त्रिपुरेश्वरस्थित दथरथ रंगशालामा बुधबार भएको खेलमा शेर्पा र पुलिसले १–१ गोलको बराबरी खेल्दै अंक बाँडेका हुन् । शेर्पाका लागि कप्तान विश्वास श्रेष्ठले गोल गर्दा पुलिसका सुमन लामाले बराबरी गोल फर्काएका थिए । खेलको ५३ सेकेन्डमै कप्तान विश्वास श्रेष्ठले गोल गर्दै शेर्पालाई अग्रता दिलाएका थिए । जारी लिगकै यो सर्वाधिक छिटो गोल हो ।

मैदानको मध्य भागमा अलरिच सिवे र विश्वासको समन्वयमा बनेको मुभमा विश्वास श्रेष्ठको पेनाल्टी बक्सबाहिरको प्रहार पुलिसका गोलरक्षक शत्रुघन कुमार चौधरीलाई लाग्दै गोलमा परिणत भएको थियो । २४औं मिनेटमा भरत साहले पेनाल्टी बक्समा सुवर्ण अवसर पाएपनि उनले बललाई नियन्त्रणमा लिन सकेन ।

४६औं मिनेटमा अन्जन राईले पेनाल्टी बक्समा सुवर्ण अवसर पाएपनि उनको प्रहार आकासिदा पुलिस बराबरीबाट चुक्यो । ६०औं मिनेटमा सुमन लामाले गोल गर्दै खेललाई १–१ गोलको बराबरीमा ल्याए । शेर्पाका डिफेन्डर अलरिव सिवे चोट बोक्दै मैदान बाहिर उपचारको क्रममा रहँदा पुलिसले त्यसको फाइदा उठाउँदै गोल गर्न सफल भएको थियो ।

रवि पासवानको क्रसमा अनमार्क रहेका सुमनले सिक्स यार्ड बक्सभित्रबाट सहजै गोल गर्न सफल भएका थिए । ६५औं मिनेटमा तेज तामाङको कर्नरमा भोलानाथ सिलवालले दिएको क्रसमा अजित भण्डारीको प्रहारलाई शेर्पाका गोलक्षक किशोर गिरीले पञ्च गर्दै बचाए ।

शेर्पाको यो दोस्रो बराबरी हो । यसअघि शेर्पाले संकटासँग १–१ गोल बराबरी खेल्दा मनाङसँग १–० को हार बेहोरेको थियो । अपराजित पुलिसको पनि यो दोस्रो बराबरी हो । पुलिसले पहिलो खेलमा आर्मीसँग १–१ गोलको बराबरी खेल्दा जावलाखेललाई १–० ले पराजित गरेको थियो । बराबरीपछि पुलिसको ३ खेलबाट ५ अंक पुगेको छ । शेर्पाको तीन खेलबाट २ अंक छ ।