एजेन्सी – युईएफए च्याम्पियन्स लिगको समूह चरणको अन्तिम खेलमा आज (मंगलबार) राति समूह विजेता बन्न स्पेनिस क्लब रियल म्याड्रिड र इटालियन क्लब इन्टर मिलानबीच प्रतिस्पर्धा हुँदैछ ।

खेल नेपाली समयअनुसार राति १ः४५ बजे रियलको घरेलु मैदान सान्टियागो बर्नबेउमा हुनेछ । घरेलु मैदानमा हुने खेलमा रियल इन्टरलाई पराजित गर्दै समूह ‘डी’ को विजेता बन्दै नकआउट चरणमा प्रवेश गर्ने दाउमा हुनेछ ।

रियल ५ खेलबाट १२ अंक जोडेर शीर्षस्थानमा रहेको छ । शीर्षस्थानमा रहेको रियललाई समूह विजेता बन्न बराबरी नै पर्याप्त हुनेछ । तर रियल जितसहित अघि बढ्न चाहन्छ । इन्टरविरुद्ध कप्तान तथा फरवार्ड करिम बेन्जेमाले खेल्ने सम्भावना न्युन छ । उनले रियल सोसिडाडविरुद्ध २–० को जित निकालेको खेलमा चोट बोक्दै मैदान छाडेका थिए ।

उनको स्थानमा लुका जोभिकले खेल्ने सम्भावना छ । टोलीसँग भिनिसियस जुनियर, मार्काे एसेन्सियो, क्यासमिरो, टोनी क्रुस, लुका मोड्रिच, डेभिड अलाबा, इडर मिलिसाओ, ड्यानी कार्भाजल, फेडे भाल्भेर्डे र गोलरक्षक थिवाउट कोर्टुवा रहेका छन् ।

यता, इन्टर मिलान पनि घरेलु टोलीलाई पराजित गर्दै समूह विजेता बन्दै अघिल्लो चरणमा पुग्ने योजनामा मैदान उत्रनेछ । रियललाई हराउन सके इन्टर समूह विजेता बन्नेछ ।

बराबरी या हारले इन्टर समूह उपविजेता नै बन्नेछ । टोलीसँग लाउटारो मार्टिनेज, इडेन जेको, इभान पेरिसिस, हाकान चाल्हानोग्लु, मार्सेलो ब्रोजोभिच, निकोला बरेल्ला, डेन्जेल डमफ्रेज, स्टेफन डि भ्राए, मिलान स्क्रिनिएर र गोलरक्षक समिर हान्डानोभिच रहेका छन् ।

यि दुई टोलीले समूह चरणमा प्रतिस्पर्धा गर्दा रियलले १–० को जित निकोलेको थियो । यि दुई टोली हालसम्म ६ पटक प्रतिस्पर्धा गर्दा ५ खेलमा रियल विजयी हुँदा एक खेल बराबरीमा सकिएको छ ।