काठमाडौं (हाम्रो खेलकुद)– कतार एअरवेज सहिद स्मारक ए डिभिजन लिगमा पहिलो जित दर्ता गरेपछि त्रिभुवन आर्मी फुटबल क्लबका प्रशिक्षक नवीन न्यौपानेले टोली उपाधि दौडमा फर्केको बताएका छन् ।

दशरथ रंगशालामा आइतबार कप्तान भरत खवासको गोलमा ब्रिगेड ब्वाइज क्लब (बिबिसी) लाई १–० ले हराएपछि न्यौपानेले भने, ‘आज ३ अंक एकमदै महत्त्वपूर्ण थियो । यसले हामीलाई अघि बढ्न मद्दत गरेको छ । अब उपाधि दौडमा अघि बढेको जस्तो लाइछ लाग्छ । स्ट्राइकिङ लाइनमा अझै पनि समस्या छ । मौका त धेरै बनायौं । तर स्कोर निस्केको छैन । राम्रो पक्ष आज स्टाइकरले गोल गरेका छौं । माथि टप ४ मा आयौं ।’

तेस्रो खेलमा आर्मीको यो पहिलो जित हो । पहिलो खेलमा अर्को विभागिय टोली नेपाल पुलिस क्लबसँग १–१ को बराबरी खेलको आर्मी दोस्रो खेलमा मछिन्द्र क्लबसँग गोलरहित बराबरीमा सन्तोष मान्नुपरेको थियो । ‘कडा मेहनतको प्रतिफल आजको जित हो’, न्यौपानेले थपे, ‘शीर्षस्थानमा रहेका सातदोबाटो, मनाङ मस्र्याङ्दी, संकटा माथि दबाब बढाउँदै गएका छौं ।’

मनाङका पूर्व खेलाडी समेत रहेका न्यौपानले लिगमा सबै टोली उत्तिकै राम्रो रहेको उल्लेख गर्दै भने, ‘विदेशी खेलाडी पनि त्यत्तिकै राम्रो छन् । कुनै टोली कमजोर छैन । आर्मी बलिया छ भन्नुको मतलब अरु नराम्रो भन्न मिल्दैन ।’

न्यौपानेले हरेक खेलमा खेलाडी परिवर्तन पनि धेरै मौका सिर्जना गर्न टोली सफल रहेको सुनाए । ‘हामीले खेलाडी परिवर्तन पछि गोलका लागि मौका सिर्जना गरेका छौं’, उनले भने, ‘यसअघि त्यसलाई सदुपयो गर्न सकेका थिएनौं । आज सक्यौं । त्यो मेरो लागि खुसीको कुरा हो । आज मौका पनि अघिल्ला खेलहरुमा भन्दा रबढी भयो ।’

आफ्नो टोली उपाधि दाबेदार भएको दोहोराउँदै न्यौपानेले थपे, ‘हामी अन्य खेलमा मौका चुकाउँन चाहदैनौं । हाम्रो टोली हाइ इन्टेन्सिटीमा खेल्छ । यस्तै खेल्ने हो । मौका पनि त्यसमै आउने हो । मौकालाई अझै सदुपयोग गर्न सकेका छैनौं ।’

अघिल्लो २ खेलमा ४ अंक जोडेको बिबिसीका प्रशिक्षकले डिफेन्सलाइन अलमलमा पर्दा गोल खान पुगेको बताए । ‘ओभर अलमा फिप्टी फिप्टीको खेल थियो । अफसाइड भनेर हाम्रा डिफेन्डर लाइन्स म्यान हेरेर कुदे’, उनले भने, ‘त्यहि दुर्भाग्य भयो । भरतले राम्रो गोल निकाले ।’

बलियो आर्मीविरुद्ध एक अंक लिने लक्ष्यका साथ उत्रिएपनि दुर्भाग्यवश हार्नु परेको जनाउँदै श्रेष्ठले भने, ‘आर्मीजस्तो बलियो टिमसँग एक अंक लिने लक्ष्य थियो । दुर्भाग्य भयो । लिन सकेनौं । आर्मी लिगको वान अफ दि वेष्ट टिम हो । त्यसबाहेक हाम्रो टोलीले मेहनत गरेर खेल्यो ।’

एपिएफलाई पहिलो खेलमा ३–२ ले हराएको बिबिसीले दोस्रो खेलमा एनआरटीसँग गोलरहित बराबरी खेलेको थियो ।