काठमाडौं (हाम्रो खेदकुद) – खेल सकिन ५ मिनेट बाँकी रहँदा कप्तान भरत खवासले गोल गरेपछि विभागीय त्रिभुवन आर्मी फुटबल क्लबले कतार एअरवेज सहिद स्मारक ‘ए’ डिभिजन लिगमा पहिलो जित निकालेको छ ।

त्रिपुरेश्वरस्थित दशरथ रंगशालामा निराशजनक बनेको खेलमा आर्मीले ब्रिगेड ब्वाइज क्लब (बीबीसी) लाई १–० ले पराजित गर्दै लिगमा पहिलो जित दर्ता गरेको हो । आमीले पहिलो खेलमा पुलिससँग १–१ गोलको बराबरी खेल्दा मच्छ्रिन्द्रसँग गोलरहित बराबरी खेलेको थियो ।

निराशजनक बनेको खेलमा दुवै टोलीले खासै पोस्ट आक्रमण बुन्न नसकेपनि खेलको अन्त्यतिर आर्मीले बीबीसीलाई दवावमा राख्दै गोल गर्न सफल भएको थियो ।

खेलको पहिलो मिनेटमा नै गौतम श्रेष्ठको क्रसलाई कप्तान भरत खवासले पेनाल्टी बक्समा अवसर पाएपनि सदुपयोग गर्न सकेनन् । त्यही बललाई जर्ज प्रिन्स कार्कीले भेट्न सकेन । २७औं मिनेटमा शिशिर लेखीको फ्रिकिक क्रसबारबाट थोरै बाहिरिदा बीबीसी अग्रता लिनबाट चुक्यो ।

५७औं मिनेटमा गौतम श्रेष्ठका थ्रु बलमा विकास तामाङको हेडरलाई बीबीसीका गोलक्षक पुर्ण चेम्जोङले पञ्च गर्दै बचाए । ६१औं मिनेटमा विवेक बस्नेतको क्रसलाई मनोज राईले गोललाइन नजिकैबाट क्लियर गरिदिदा आर्मी अग्रता लिनबाट चुक्यो । लगत्तै ६२औं मिनेटमा सन्तोष तामाङको पासमा टेक बहादुर बुढाथोकीको चिप प्रहार पोस्ट माथिबाट बाहिरियो ।

८५औं मिनेटमा सन्तोष तामाङले मिलाइदिएको पासलाई भरतले अफसाइड बिट ट्याप गर्दै वान भर्सेस वानको स्थितिमा गोल गर्दा बीबीसीका गोलरक्षकले कुनै प्रतिक्रिया जनाउन सकेन । त्यसपछि थप गोल निस्कन नसक्दा आर्मी विजयी हुन सफल भयो । खेलको अन्त्यतिर आर्मीले बीबीसीलाई दवावमा राखेपनि थप गोल गर्न सकेन ।

बीबीसीले भने लिगमा पहिलो हार बेहोरेको छ । बीबीसीले पहिलो खेलमा एपीएफलाई ३–२ ले पराजित गर्दा एनआरटीसँग गोलरहित बराबरी खेलेको थियो । जितसँगै आर्मीको ३ खेलबाट ५ अंक पुगेको छ । पराजित बीबीसीको ४ अंक छ ।