काठमाडौं (हाम्रो खेलकुद)– पहिलो हाफको अन्त्यतिर अजायी मार्टिन चम्केपछि सातदोबाटो युथ क्लबले नेपाल एपिएफ क्लबविरुद्धको मध्यान्तर अघि २–० को अग्रता लिएको छ।

४२ औं मिनेटमा मार्टिन अजयीले गोलबाट सातदोबाटोले अग्रता लिएको थियो । कप्तान मानबहादुर तामाङको फ्रिकिक प्रहारलाई पेनाल्टी बक्सबाट एपिएफका खेलाडीले बल क्लियरको प्रयास गरे । त्यहि रिबाउन्डमा प्राप्त बललाई सुदीप गुरुङले पास निकाले र त्यहि बलमा मार्टिनले पेनाल्टी बक्सबाट एपिएफका परिवर्तित गोलकिपर दिलकुमार लिम्बुलाई कुनै मौका नदिइ गोल गरेका थिए ।

मार्टिनले नै ६ मिनेट इन्जुरी समयको अन्तिम मिनेटमा अर्को गोल थपेका थिए । पासाङ लामाले दिएको पासमा मार्टिनले प्रहार गरेको बललाई दिलकुमारले नियन्त्रणमा लिन सकेनन्, त्यहि बलमा मार्टिनले हेड गर्दै अग्रतालाई दोब्बर पारे ।

अघिल्लो खेलमा थ्री स्टार क्लबलाई १–० ले नै स्तब्ध पारेको सातदोबाटोले ३९ औं मिनेटमा गोलको राम्रो अवसर पाएको थियो । दुई पटकको प्रहारलाई एपिएफका गोलकिपर दिलकुमारले सफल हुन दिदएनन् । पाँचौं मिनेटमा आभाष लामिछानेले प्राप्त मौका सदुपयोग गर्न नसक्दा एपिएफ अग्रता लिनबाट चुक्यो । २४ औं मिनेटमा सातदोबाटोका मानबहादुरको प्रहार पोष्ट माथिबाट बाहिरियो ।

कतार एअरवेज सहिद स्मारक ए डिभिजन लिगमा सातदोबाटो अघिल्लो दुई खेलमा अपराजित रहेको थियो । पहिलो खेलमा फ्रेन्ड्ससँग बराबरी खेलेको सातदोबाटोले दोस्रो खेलमा थ्री स्टारलाई स्तब्ध पारेको थियो । ब्रिगेड ब्वाइज क्लबसँग पहिलो खेलमा ३–२ को हार बेहोरेको एपिएफले दोस्रो खेल च्यासलसँग १–० ले गुमाएको थियो ।