काठमाडौं (हाम्रो खेलकुद) – कतार एअरवेज सहिद स्मारक ‘ए’ डिभिजन लिगमा आजदेखि तेस्रो चरणका खेलहरू सुरु हुँदैछ । तेस्रो चरणका सबै ७ खेलहरु त्रिपुरेश्वरस्थित दशरथ रंगशालमा हुने अखिल नेपाल फुटबल संघ (एन्फा) ले जनाएको छ ।

तेस्रो चरणको पहिलो खेल फ्रेन्ड्स क्लब र रुस्लान थ्री स्टार क्लबबीच ललितपुर डर्वीको प्रतिस्पर्धा हुनेछ । खेल दिउँसको १ बजेपछि हुनेछ ।दोस्रो खेलमा नव प्रवेशी सातदोबाटो युथ क्लब र विभागीय नेपाल एपीएफ फुटबल क्लबबीच प्रतिस्पर्धा हुँदैछ । खेल दिउँसो ४ः४५ बजेपछि हुनेछ ।

ललितपुर डर्वीमा थ्री स्टार फ्रेन्ड्सलाई पराजित गर्दै लिगमा दोस्रो जित निकाल्ने लक्ष्यमा हुनेछ । पहिलो खेलमा च्यासल युथ क्लबलाई ३–० ले पराजित गरेको थ्री स्टार दोस्रो खेलमा सातदोबाटोसँग १–० ले स्तब्ध बनेको थियो । थ्री स्टार फ्रेन्ड्सलाई हराउँदै आफ्नो जितको लयमा फर्कन चाहन्छ ।

यता, दुई खेल खेल्दा जित हात पार्न नसकेको फ्रेन्ड्स थ्री स्टारलाई स्तब्ध पार्दै लिगमा पहिलो जितको लक्ष्यमा मैदान उत्रनेछ । पहिलो खेलमा सातदोबाटोसँग गोलरहित बराबरी खेलेको फ्रेन्ड्स दोस्रो खेलमा संकटासँग अग्रता जोगाउन नसक्दा २–१ ले पराजित भएको थियो ।

गत सिजनको लिगमा फ्रेन्ड्सले थ्री स्टारलाई १–० ले पराजित गरेको थियो । फ्रेन्ड्स यसपटक पनि सोहि इतिहास दोहोर्याउने लक्ष्यमा हुँदा थ्री स्टार उक्त हारको बदला लिदै जितको लयमा फर्कने दाउमा हुनेछ ।

यता सुरुवाती दुई खेलमा अपराजित रहँदै लिगमा दमदार सुरुवात गरेको नवप्रवेशी सातदोबाटो एपीएफलाई पराजित गर्दै लिगमा अपराजित रहने लक्ष्यमा हुनेछ । पहिलो खेलमा फ्रेन्ड्ससँग गोलरहित बराबरी खेलेको सातदोबाटोले दोस्रो खेलमा थ्री स्टारमाथि १–० को सनसनीपुर्ण जित निकालेको थियो । लगातार दुई हार बेहोरेर अंकविहीन एपिएफ पहिलो अंक जोड्ने दाउमा हुनेछ ।