एजेन्सी – गोल र कार्डको वर्षा भएको खेलमा लाजियो र उडिनेसले इटालियन सिरी ‘ए’ मा रोमाञ्चक बराबरी खेलेका छन् । १० खेलाडीमा समेटिएको लाजियो र ९ खेलाडीमा समेटिएको उडिनेसले ४–४ गोलको रोमाञ्चक बराबरी खेल्दै अंक बाँडेको हो ।

घरेलु टोली लाजियोले दुई गोलले पछि परेको खेललाई बराबरीमा रोक्न सफल भएको हो । लाजियोका सिरो इम्मोविले, पेड्रो रोड्रिग्वेज, सेर्गेज मिलिन्कोभिक साभिक र फ्रान्सिस्को एसरविले गोल गरे । उडिनेसका बेटोले दुई तथा नाहुइल मोलिना र टोलगे अर्सलानले समान एक गोल गरे ।

रोमामा बिहीबार राति भएको खेलको १७औं मिनेटमा बेटोको गोलबाट घरेलु टोली पछि परेको थियो । ३२औं मिनेटमा बेटोले गोल गर्दै उडिनेसको अग्रता दोब्बर पारे । ३४औं मिनेटमा सिरो इम्मोविलेले गोल गर्दै लाजियोलाई खेलमा फर्कने संकेत दिए । ४४औं मिनेटमा नाहुइल मोलिनाले गोल गरेपछि पहिलो हाफमा उडिनेस ३–१ ले अघि बढ्यो ।

५१औं मिनेटमा पेड्रो रोड्रिग्वेजले गोल गर्दै खेललाई ३–२ को अवस्थामा ल्याए । ५६औं मिनेटमा सेर्गेजले गोल गर्दै खेललाई ३– ३ गोलको बराबरीमा ल्याए । ५७औं मिनेटमा प्याट्रिक दोहोरो पहेँलो कार्ड खाँदै मैदानबाट बाहिरिएपछि घरेलु टोली १० खेलाडीमा समेटिन पुग्यो । ६९औं मिनेटमा नाहुइल मोलिना दोहोरो पहेँलो कार्ड खाँदै मैदानबाट बाहिरिएपछि उडिनेस पनि १० खेलाडीमा समेटिन पुग्यो ।

७९औं मिनेटमा फ्रान्सिस्को एसरविले गोल गर्दै लाजियोलाई पहिलोपटक खेलमा अग्रता दिलाए । इन्ज्युरी समयको थप गरिएको नवौं मिनेटमा अर्सलानले गोल गर्दै खेललाई ४–४ गोलको बराबरीमा ल्याए । इन्ज्युरी समयको थप गरिएको १०औं मिनेटमा वालेस सिधै रातो कार्ड खाँदै मैदानबाट बाहिरिएपछि उडिनेस ९ खेलाडीमा समेटिन पुग्यो ।

तनावपुर्ण बनेको खेलमा रेफ्री मार्काे पिसिनिनीले ८ पहेँलो कार्ड र ३ रातो कार्ड देखाएको थियो । यो बराबरीसँगै लाजियो १५ खेलबाट २२ अंक जोडेर नवौं स्थानमा यथावत रहेको छ । उडिनेस १६ अंक जोडेर १४औं स्थानमा छ ।