काठमाडौं (हाम्रो खेलकुद) – कतार एअरवेज सहिद स्मारक ‘ए’ डिभिजन लिग अन्तरगतको दोस्रो राउन्डको अन्तिम खेलमा त्रिभुवन आर्मी फुटबल क्लबले मच्छिन्द्र फुटबल क्लबविरुद्ध पहिलो रोजाईमा तीन परिवर्तन गरेका छन् ।

प्रशिक्षक नविन न्यौपानेले पुलिससँग पहिलो खेलमा पहिलो रोजाईमा खेलेका जगजित श्रेष्ठ, युद्ध शाही र दिनेश हेन्जनलाई बाहिर राखेका हुन् । पहिलो रोजाईमा पुलिसविरुद्ध गोल गरेका विवेक बस्नेत, बिमल पाण्डेय र सुदिल राईले मौका पाएका छन् ।

गोलरक्षकमा विकेश कुथु रहँदा कप्तान भरत खवास, जर्जप्रिन्स कार्की, विकास तामाङ, सन्तोष तामाङ, सुमन अर्याल, सेसेहाङ आङदेम्वे र गौतम श्रेष्ठ रहेका छन् ।

मच्छिन्द्रले एनआरटीविरुद्धको पहिलो खेलको सेटलाई नै आर्मीविरुद्ध निरन्तरता दिएके छ । कप्ता नसुजल श्रेष्ठ, विशाल राई, रन्जित धिमाल, देवेन्द्र तामाङ, सुनिल बल, अभिषेक बराल, विशाल श्रेष्ठ, आन्द्रेस निया, छिरिङ गुरुङ, नुर्लान नोभ्रुजोभ र ओमोलाजा करिम रहेका छन् ।

दोस्रो राउन्डको अन्तिम खेलमा साविकको विजेता मच्छिन्द्र फुटबल क्लब र त्रिभुवन आर्मी फुटबल क्लबबीच दिउँसो ४ः४५ बजे हुनेछ । मच्छिन्द्र लगातार दोस्रो जितको खोजीमा रहँदा आर्मी पहिलो जितको लक्ष्यमा हुनेछ । मच्छिन्द्रले पहिलो खेलमा एनआरटीलाई २–१ ले पराजित गर्दा आर्मीले विभागीय डर्वीमा पुलिससँग १–१ गोलको बराबरी खेलेको थियो ।